मान्यवरांचा‎ सत्कार:स्पर्घा परीक्षेची तयारी करणाऱ्या मुलांना‎ जिल्हाधिकारी मुधोळांच्या हस्ते टॅब वाटप‎

महाराष्ट्र शासनाच्या इतर मागास व‎ बहुजन कल्याण विभागाची स्वायत्त संस्था‎ महात्मा ज्योतिबा फुले संशोधन व‎ प्रशिक्षण संस्था (महाज्योती) नागपूर,‎ यांच्या मार्फत जिल्हाधिकारी दिपा‎ मुधोळ-मुंडे यांच्या हस्ते जेईई, नीट,‎ एमएचटी-सीईटी ची तयारी करणाऱ्या‎ व्हीजेएनटी, ओबीसी, एसबीसी प्रवर्गातील‎ ३१४ विद्यार्थ्यांना सामाजिक न्याय भवन‎ बीड या ठिकाणी टॅबचे वाटप करण्यात‎ आले.‎ या प्रसंगी व्यासपीठावर जिल्हाधिकारी‎ दिपा मुधोळ-मुंडे, अध्यक्ष जिल्हा जात‎ प्रमाणपत्र पडताळणी जगदाळे, झेडपीचे‎ अतिरिक्त मुख्य कार्यकारी अधिकारी‎ वासुदेव सोळंके, समाज कल्याण‎ सहाय्यक आयुक्त रविंद्र शिंदे यांची प्रमुख‎ उपस्थिती होती.

सर्व प्रथम क्रांतीज्योती‎ सावित्रीबाई फुले यांच्या पुण्यतिथीचे‎ औचित्य साधून त्यांच्या प्रतिमेचे पूजन‎ करण्यात आले. त्यानंतर महात्मा फुले व‎ राजर्षी शाहू महाराज यांच्या प्रतिमेचे पूजन‎ करण्यात आले व उपस्थित मान्यवरांचा‎ सत्कार सहाय्यक आयुक्त रविंद्र शिंदे‎ यांच्या हस्ते करण्यात आला. यानंतर ‘जय‎ जय महाराष्ट्र माझा’ या राज्य गीताचे‎ गायन घेण्यात आले. या प्रसंगी वासुदेव‎ साळुंके, जगदाळे यांनी आपले मनोगत‎ व्यक्त केले. जिल्हाधिकारी दिपा‎ मुधोळ-मुंडे यांनी विद्यार्थी व उपस्थितांना‎ मार्गदर्शन केले. त्या म्हणाल्या की,‎ विद्यार्थ्यांनी सर्व प्रथम आपल्या‎ अभ्यासाला महत्व दिले पाहिजे. वेळेचे‎ महत्व ओळखले पाहिजे.

आज कित्येक‎ विद्यार्थी व्हॉट्सअ‍ॅप, फेसबुकचा वापर‎ करुन तासं-तास आपला वेळ वाया‎ घालवतात. व्हॉट्सअ‍ॅप आपल्या‎ मोबाईलमधून डिलिट करावे. मोबाईलचा‎ वापर कमीत कमी प्रमाणात करावा.‎ यशाची मधुर फळे चाखायची असतील‎ तर कठोर मेहनत व वेळेचे व्यवस्थापन‎ महत्वाचे आहे. या कार्यक्रमाचे‎ सुत्रसंचालन मुख्याध्यापक दत्तात्रय शिंदे‎ यांनी केले तर कार्यक्रमाचे आभार प्रदर्शन‎ समाज कल्याण निरीक्षक लक्ष्मण बारगजे‎ यांनी केले. यावेळी अनेक पालक,‎ विद्यार्थी तसेच समाज कल्याण‎ सहा.आयुक्त कार्यालयातील सर्व‎ कर्मचारी उपस्थित होते.‎