चारसौबीसी:5 महिन्यांत 19 वाहनांची बनावट नोंदणी,‎ 16 वाहनांवर कंपन्यांचे 3 कोटींचे कर्ज‎

परराज्यातील वाहनांची अस्तित्वात नसलेले चेसिस नंबर‎ टाकून बीडमध्ये १९ वाहनांची बनावट नोंदणी केल्याचा‎ प्रकार समोर आला आहे. पाच महिन्यांच्या काळात‎ अतिरिक्त पदभार असताना श्रीकृष्ण नकाते याने हा प्रताप‎ केला. दरम्यान यातील तब्बल १६ वाहनांवर विविध बँका,‎ खासगी फायनान्स कंपन्याचे ३ कोटींचे कर्ज आहे. श्रीकृष्ण‎ नकातेने यापूर्वीही औरंगाबादेत कार्यरत असताना अशाच‎ प्रकारचा कारनामा केला होता तेंव्हाही गुन्हा नोंद झाला‎ होता.‎

बीड येथील उपप्रादेशीक परिवहन अधिकारी‎ कार्यालयातून जुलै ते नोव्हेंबर २०१७ या काळात टाटा‎ मोटर्सच्या १९ मालवाहू वाहनांची नोंदणी केली होती मात्र ही‎ नोंदणी करताना बनावट चेसिस नंबर वापरले गेल्याची बाब‎ समोर आली होती. परराज्यातील वाहनांचे चेसीस नंबर‎ बदलून ही नोंदणी केली गेली होती. यासाठी परिवहन‎ विभागाने टाटा मोटर्सला दोन वेळा पत्र व्यवहार करुन‎ त्यांच्याकडून या वाहनांची माहिती मागवली होती मात्र,‎ बीडमध्ये नोंदवलेल्या १९ वाहनांचे चेसीस नंबर बनावट‎ असल्याचे टाटा मोटर्सने स्पष्ट केले होते.

तत्कालीन‎ उपप्रादेशीक परिवहन अधिकारी श्रीकृष्ण नकाते याने हा‎ सर्व कारनामा केला हाेता. या प्रकरणी राज्याचे परिवन‎ उपायुक्त संजय मेत्रेवार यांनी बीडच्या आरटीओंना पत्र‎ पाठवून गुन्हा नोंद करण्याचे आदेश दिले होते. गुुरुवारी रात्री‎ याप्रकरणी तत्कालीन उपप्रादेशीक परिवहन अधिकारी‎ श्रीकृष्ण नकातेवर फसवणूकीचा गुन्हा नोंदवला गेला आहे.‎ दरम्यान, श्रीकृष्ण नकाते हा यापूर्वीही वादग्रस्त राहिलेला‎ असून औरंगाबादेत तो कार्यरत असताना त्याने अशाच‎ प्रकारे बनावट नोंदणी केली होती.‎

नोंदणी प्रक्रियेला फाटा‎ दरम्यान, ही बनवाबनवी करताना वाहन नोंदणीची ही नियमित‎ प्रक्रिया असते त्याला फाटा देण्यात आल्याचे समोर आले.‎ श्रीकृष्ण नकातेने सर्व टप्प्यांची प्रक्रिया एकट्याच्याच लॉगीन‎ इन वरुन केली होती शिवाय, नोंदणीनंतर ते कागदपत्रही गायब‎ केले गेले आहेत. हे निदर्शनास आल्यानंतर त्याच्यावर गुन्हा‎ नोंदवण्याचे आदेश दिले गेले होते.‎

दरम्यान, श्रीकृष्ण नकातेने केवळ बनावट नोंदणी केली असून या सर्व प्रक्रियेत मोठे‎ रॅकेट सक्रिय आहे. परराज्यातून वाहने आणून त्या वाहनांवर कर्ज घेऊन, त्याची विक्री‎ केली जात आहे. यासाठी नकाते सारखे अधिकारी हाताशी धरुन रॅकेट चालवले जाते.‎ सध्या तरी केवळ नकातेवर गुन्हा नोंद असून या तपासात हे सर्व रॅकेत शोधणे आता‎ पोलिसांसमोर आव्हान आहे.‎

पथक रवाना केले आहे‎ या गुन्ह्याच्या अनुषंगाने शुक्रवारी काही कागदपत्रे‎ ताब्यात घेतली आहेत. ज्याआधारे नकातेला‎ अटक करण्यात येईल. अटकेसाठी पथक रवाना‎ करण्यात आले आहे. यामध्ये आणखी कोण‎ काेण सहभागी आहेत याचाही शोध घेतला जात‎ आहे. प्रकरणाच्या मुळाशी जाऊन तपास केला‎ जाईल.‎ - संतोष साबळे, पोलिस निरीक्षक, बीड ग्रामीण ठाणे‎

३ कोटींची कर्ज वसूली कशी?‎ दरम्यान, १९ पैकी १६ वाहनांवर‎ आयसीआयसीआय, सुंदरम्, टाटा मोटर्स,‎ आयकेएफ, एचडीबी, इंडसंड, श्रीराम, टीव्हीएस,‎ इक्वाटीस यासह अन्य काही खासगी फायनान्स‎ कंपन्यांचे व बँकांचे ३ कोटी रुपयांचे कर्ज आहे.‎ दरम्यान, यातील थकीत कर्जाचे पुढे काय होणार‎ हा प्रश्न आहे. त्यामुळे कर्ज देणाऱ्या या संस्थाही‎ अडचणीत आल्या आहेत.‎‎