केजमधील प्रकार, यंत्रणेची झाली धावपळ:दारूच्या नशेत फेक कॉल करून वाळू चोरीची दिली खोटी माहिती

दारूच्या नशेत दोघांनी वाळू चोरी केली जात असल्याची माहिती फेक कॉल करून केज पोलिसांना दिली. त्यानंतर पोलिसांनी घटनास्थळी भेट दिली असता फेक कॉल करणारे त्यांना बघून हसू लागले. शेवटी पोलिसांनी या दिशाभूल करणाऱ्या दोघांविरुद्ध गुन्हा दाखल केला.केज तालुक्यातील लाखा येथे वाळू चोरी होत असल्याची माहिती ही ६ डिसेंबर रोजी दुपारी पोलिसांच्या मदतीसाठी असलेल्या ११२ क्रमांकावर फोन करून देण्यात आली. याची खात्री करण्यासाठी माहिती देणाऱ्या लोकांनी अनेक वेळा कॉल केले. केज पोलिसांचा फौजफाटा हा ठिकाणी दाखल झाला. मात्र या ठिकाणी वाळू चोरीचा प्रकार निदर्शनास आला नाही. उलट पोलिस त्या ठिकाणी गेले असता दोघे पोलिसांकडे बघून हसू लागले. त्यामुळे पोलिसांना फेक कॉल असल्याचा संशय आला. कॉल करणारे आश्रुबा भास्कर चव्हाण, शिवकुमार संदिपान घाडगे हे दारूच्या नशेत असल्याचे लक्षात आले. सहायक फौजदार रमेश शंकरराव सानप यांच्या तक्रारीवरून दोघांविरुद्ध केज पोलिसांत गुन्हा दाखल झाला.