गैरसोय:होळ - कळंमअंबा - धारूर रस्ता गेला‎ खड्ड्यात; दुरुस्तीसाठी ग्रामस्थ आक्रमक‎

केज तालुक्यातील होळ ते कळंमअंबा ते‎ धारूरला जोडणाऱ्या रस्त्याची दुरवस्था‎ झाली आहे. या रस्त्यावरून जीव मुठीत‎ धरून प्रवास करावा लागत आहे. याकडे‎ सार्वजनिक बांधकाम विभागाच्या‎ अधिकाऱ्यांसह लोकप्रतिनिधींचे दुर्लक्ष‎ होत आहे. त्यामुळे प्रवाशांतून संताप‎ व्यक्त केला जात आहे.‎ तालुक्यातील होळ, कळमअंबा, उंदरी‎ आणि धारूर तालुक्यातील तांदळवाडी व‎ पुढे धारूर शहराला जोडणाऱ्या रस्त्याचे‎ एकूण अंतर २० कि.मी. आहे. यातील १३‎ किमी रस्ता हा केज सार्वजनिक बांधकाम‎ उपविभागाच्या तर उर्वरित ७ किमी रस्ता‎ धारूर उपविभागाच्या अंतर्गत येतो.

या‎ रस्त्याची गेल्या अनेक वर्षांपासून दुरुस्ती‎ देखील झालेली नाही. त्यामुळे या रस्त्यावर‎ मोठमोठे खड्डे आणि दुतर्फा मोठी झुडपे‎ दिसून येत आहेत. त्यामुळे रस्त्यावरून‎ प्रवास करताना प्रवाशांना कसरत करावी‎ लागते. प्रत्यक्षात कधीही दुरुस्ती झालेली‎ दिसून आली नाही. त्यामुळे ‛कागदावरच‎ दुरुस्ती’ होते की काय? अशी शंका‎ उपस्थित केली जात आहे. धारूर व केज‎ तालुक्याला जोडणाऱ्या या रस्त्याचे काम‎ नव्याने सुरू करण्यात यावे, अन्यथा रास्ता‎ रोको आंदोलन करण्याचा इशारा होळ व‎ कळमअंबा ग्रामस्थांनी दिला आहे.

होळ,‎ कळमअंबा, उंदरी आणि धारूर‎ तालुक्यातील तांदळवाडी व पुढे धारूर‎ शहराला जोडणाऱ्या महत्त्वाच्या रस्त्याची‎ एवढी दुरवस्था झालेली असतानाही‎ त्याकडे संबंधित विभागाचे अधिकारी‎ दुर्लक्ष देत नसल्याने या भागातील‎ वाहनचालक, शेतकरी, नागरीकांच्या‎ भावना तीव्र आहेत. मोठमोठ्या खड्डयांमुळे‎ विशेषत: या भागातील दुचाकीस्वारांना तर‎ पाठीचे विकार जडले आहेत. एवढेच नाही‎ तर अपघात नित्याचेच झाले असून अनेक‎ वाहने नादुरूस्त होत आहेत.‎ या रस्त्याबाबत केज येथील सार्वजनिक‎ बांधकाम उपविभागाच्या उपअभियंत्यांना‎ दि.२९ डिसेंबर रोजी निवेदन देण्यात आले.‎

निवेदनावर होळ येथील युवा नेते संग्राम‎ शिंदे, रामराव लोमटे, अ‍ॅड. राजेश शिंदे,‎ गिरिधर शिंदे, हरिश्चंद्र शिंदे, शिवाजी‎ शिंदे, भारत शिंदे, विष्णू शिंदे, ज्ञानेश्वर‎ गायकवाड, अमोल थोरात आदींच्या‎ स्वाक्षऱ्या आहेत.‎ दरम्यान, याविषयी सार्वजनिक बांधकाम‎ उपविभागाचे शाखा अभियंता गोविंद‎ शेळके यांच्याशी संपर्क साधला होता.‎ परंतु त्यांचा भ्रमणध्वनी संपर्क क्षेत्राबाहेर‎ असल्यामुळे विभागाचे म्हणणे समजू‎ शकले नाही. सार्वजनिक बांधकाम विभाग‎ अंतर्गत असलेल्या रस्त्यांच्या दुरुस्तीसाठी‎ वार्षिक देखभाल दुरुस्ती योजनेअंतर्गत लाखो‎ रुपयांचा निधी येतो. या निधीतून अनेकदा‎ कागदावरच दुरुस्ती केली जाते. असे प्रकार या‎ भागातील लोकप्रतिनिधी व अधिकाऱ्यांच्या‎ संगनमताने अनेकदा घडले असल्याची शंका‎ ही ग्रामस्थांनी व्यक्त केली आहे‎

धारूर, आडसला जोडणारा महत्त्वाचा रस्ता‎
होळ, कळंबअंबा हा रस्ता आडस कडे जाणाऱ्या रस्त्याला जोडतो. तसेच,‎ हाच रस्ता धारूरला जोडतो. त्याठिकाणी असलेल्या महावितरण कंपनीच्या‎ उपविभागीय कार्यालयाकडे रोहित्र दुरुस्ती, वीज बिलाच्या संदर्भातील‎ कामांसाठी होळसह पंचक्रोशीतील शेतकरी, ग्रामस्थांना खडतर प्रवास करून‎ जावे लागते.‎