संगीत खुर्ची:उखाण्यांची जुगलबंदी अन् संगीत खुर्चीमध्ये रमल्या महिला‎

माजलगाव तालुक्यातील दिंद्रुड येथे‎ व्यंकटेश पब्लिक स्कुल मध्ये‎ माता-पालकांसाठी संगीत खुर्ची व‎ उखाणे स्पर्धेचे आयोजन करण्यात‎ आले होते. हळदी कुंकू व माता पालक‎ मेळाव्याच्या निमित्ताने केलेल्या या‎ कार्यक्रमात महिलांमध्ये उखाण्यांची‎ जुगलबंदी चांगलीच रंगली.‎ स्वाती ठोंबरे यांच्या अध्यक्षतेखाली पार‎ पडलेल्या कार्यक्रमास प्रमुख पाहुणे‎ म्हणून शिल्पा शेटे या उपस्थित होत्या.‎ प्रास्ताविक विद्या पवार यांनी केले.‎

धार्मिक रूढी जपायची म्हणून हा हळदी‎ कुंकू कार्यक्रम नाही तर त्यानिमित्ताने‎ आपल्यातील कौशल्य, कलागुण तसेच‎ वैचारिक आणि बौद्धिक विचार प्रकट‎ व्हावेत व नवनवीन संकल्पनांची‎ देवाण-घेवाण व्हावी यासाठी आपण‎ सर्व जणी एकमेकींना भेटत असल्याचे‎ स्वाती ठोंबरे म्हणाल्या. खेळीमेळीच्या‎ वातावरणात झालेल्या उखाणे स्पर्धेत‎ फकीर जवळा येथील गुलनाज सय्यद‎ यांनी प्रथम क्रमांक पटकावला.‎ गुलनाज यांनी निर्धारित वेळेत मराठी व‎ हिंदी भाषेतून अनेक उखाणे सादर‎ केले. दिंद्रुडच्या रुपाली सोळंके यांनी‎ दुसरा क्रमांक मिळवला.

संगीत‎ खुर्चीच्या खेळात बाभळगावच्या‎ सरस्वती लाटे यांनी बाजी मारली.‎ जवळा येथील दीपाली खांडेकर यांचा‎ दुसरा नंबर आला. विजयी स्पर्धकांना‎ प्रथम बक्षीस म्हणून साडी तर द्वितीय‎ बक्षीस म्हणून चांदीचे नाणे भेट‎ स्वरूपात देण्यात आले.‎ आजच्या युगात स्त्रियांनी स्वावलंबी‎ होणे ही काळजी गरज आहे. महिलांनी‎ स्वतःच्या पायावर उभा राहून कुटुंबाच्या‎ आर्थिक व सामाजिक प्रगतीसाठी‎ योगदान द्यावे असे प्रतिपादन शिल्पा‎ शेटे यांनी केले.

चूल आणि मूल आपले‎ आद्य कर्तव्य आहे मात्र आपल्या‎ मनातील आशा आकांक्षा पूर्ण‎ करण्यासाठी एक पाऊल पुढे आलं‎ पाहिजे असेही त्या म्हणाल्या.‎ कार्यक्रमाचे सूत्रसंचालन गीता ठोंबरे‎ यांनी तर आभार अयोध्या लाटे यांनी‎ मानले.॰ प्रदीप ठोंबरे व बंडू खांडेकर‎ यांच्या मार्गदर्शनाखाली प्राचार्य प्रदीप‎ देशमाने, उपप्राचार्य भीम मस्के, सबीर‎ कराडो, नितीन ठोंबरे, अयोध्या लाटे,‎ माया सोळंके, संध्या राणी सटाले,‎ अमृता काकडे, गीता देशमुख, मनीषा‎ रायकर, शांताबाई भंडारी, योगेश ठोंबरे‎ आदींनी कार्यक्रम यशस्वी केला.‎