आदेश:निवडणूक खर्च सादर न करणे अंगलट;‎ सोनीजवळा सोसायटीचे 13 संचालक अपात्र‎

निवडणुकीनंतर ६० दिवसांच्या मुदतीत निवडणुकीचा खर्च‎ सादर न केल्या प्रकरणी सोनीजवळा (ता. केज) येथील सेवा‎ सहकारी सोयायटीच्या निवडून आलेल्या चेअरमन, व्हाईस‎ चेअरमनसह १३ संचालकांना अपात्र ठरविण्यात येत‎ असल्याचा निकाल केजचे सहाय्यक निबंधक आर. एम. मोटे‎ यांनी दिला आहे. तर ६ महिन्यांच्या आत पुन्हा निवडणूक‎ घेण्याचे आदेश ही त्यांनी दिले आहेत.‎ सोनीजवळा येथील सेवा सहकारी सोसायटीची २०‎ फेब्रुवारी २०२२ रोजी १३ जागांसाठी निवडणूक झाली होती.‎ निवडून आलेल्या संचालकांनी ६० दिवसांच्या मुदतीत खर्चाचा‎ तपशील निवडणूक निर्णय अधिकाऱ्यांकडे सादर करणे‎ बंधनकारक होते. मात्र त्यांनी खर्चाचा तपशील सादर केला‎ नाही. याबाबत अरुण करपे, आबासाहेब भांडवलकर, हुशेन‎ पठाण, विलास ससाणे, गोवर्धन जोगदंड यांनी सहाय्यक‎ निबंधकांकडे अपील दाखल केले होते.

सहाय्यक निबंधक‎ कार्यालयात ३ वेळा सुनावणी घेण्यात आली. दोन्ही बाजूचे‎‎‎‎‎‎‎‎‎‎ म्हणणे ऐकून घेतल्यानंतर सहाय्यक निबंधक आर. एम. मोटे‎ यांनी फिर्यादी पक्षाचे वकील अॅड. एन. पी. होळकर यांचा‎ युक्तिवाद ग्राह्य धरून निवडणूक खर्च सादर न केल्याप्रकरणी‎ सोसायटी चेअरमन सोपान ससाणे, व्हाइस चेअरमन अहेमद‎ बालेखा पठाण, संचालक शिवाजी गायकवाड, सुभाष राऊत,‎ भास्कर शेळके, सुधीर कोकाटे, नवनाथ ससाणे, जमील‎ मोहमद हुसेन सुरेशी, सुनंदा सामसे, साहेबाबाई जोगदंड,‎ उद्धव गिरी, पार्वती सूर्यवंशी, शालू भांडवलकर या संचालक‎ मंडळास अपात्र ठरविले आहे.‎

निवडणूकीला अपात्र, प्रशासक नियुक्त‎ अपात्र ठरविण्यात आलेल्या १३ संचालकांना ३ वर्षांपर्यंत‎ कोणत्याही सहकारी संस्थेची निवडणूक लढवण्यास प्रतिबंध‎ केला आहे. साेसायटीवर जिल्हा सहकारी बँकेच्या केज‎ शाखेचे तपासणीस राजेश मुळे यांची प्राधिकृत अधिकारी‎ म्हणून नियुक्ती ही केली आहे.‎