बक्षीस:बेकायदा गर्भलिंगनिदान व गर्भपात होत असल्याची माहिती‎ देणाऱ्यास लाखाचे बक्षीस; स्त्रीभ्रूण हत्या रोखण्यासाठी जागृती‎

स्त्रीभ्रूण हत्या रोखणे जनजागृती‎ अभियानांतर्गत बेकायदेशीर‎ गर्भलिंगनिदान व गर्भपात होत असल्यास‎ तक्रार नोंदवावी. याबाबतची माहिती‎ देणाऱ्यास शासनाकडून खबऱ्या बक्षीस‎ योजनेअंतर्गत एक लाख रुपयांचे बक्षीस‎ देण्यात येईल. हे बक्षीस कोर्टात केस‎ दाखल झाल्यावर देण्यात येईल. तसेच‎ माहिती देणाऱ्याचे नाव गोपनीय ठेवण्यात‎ येईल. जिल्हा बीड संपर्कासाठी‎ हेल्पलाइन क्रमांक १८००२३३४४७५ तर,‎ www.amchimulgi.com या‎ संकेतस्थळावर माहिती देण्याची व्यवस्था‎ केलेली आहे.‎ गर्भपातासाठी नवीन कायदा म्हणजेच‎ एमटीपी कायदा अस्तित्वात आला आणि‎ यात गर्भधारणा झाल्यावर २०‎ आठवड्यांपर्यंत गर्भपात करायला‎ कायदेशीर परवानगी दिली.

या‎ परवानगीची अट होती की, बाळाच्या‎ जन्मामुळे आईला शारीरिक किंवा‎ मानसिक हानी झाल्यास आणि जन्माला‎ येणाऱ्या बाळामध्ये शारीरिक किंवा‎ मानसिक व्यंग येण्याची शक्यता‎ असल्यास, गर्भाच्या आयुष्याच्या‎ निर्णयासाठी आई आणि वडील मत‎ आणि सहमती देऊ शकतात. मात्र,‎ शेवटचा निर्णय घेण्याचा अधिकार‎ डॉक्टरांचा असतो. आठवड्यापर्यंतच्या‎ गर्भपाताचा निर्णय एक नोंदणीकृत डॉक्टर‎ घेऊ शकतात. १२ ते २० आठवड्यांपर्यंत‎ विकसित झालेल्या गर्भाचा निर्णय‎ घेण्यासाठी दोन नोंदणीकृत डाॅक्टरांचे मत‎ विचारात घेणे अनिवार्य असते, असे‎ जिल्हा शल्यचिकित्सक सुरेश साबळे‎ यांनी सांगितले.‎

हिवरे बाजारचा आदर्श घेऊन प्रयत्न करावेत‎ स्त्रीभ्रूण हत्येचा प्रश्न मोठा असताना हिवरेबाजार या गावाने लोकांसमोर‎ एक नवीन आदर्श प्रस्थापित केला आहे. दुसरीही मुलगी झाल्यास तिच्या‎ विवाहाचा खर्च ग्रामनिधीतून करण्याचा निर्णय हिवरेबाजारच्या ग्रामसभेत‎ घेण्यात आला आहे. तसेच मुलगी सज्ञान झाल्यानंतर म्हणजे अठरा वर्षांची‎ झाल्यानंतर त्या रकमेचे व्याज व रक्कम तिच्या लग्नासाठी वापरण्यात येणार‎ आहे. उल्लेखनीय बाब म्हणजे या वर्षीचा राज्यातील मुलींचा जन्मदर एक‎ हजार मागे ८७५ तर हिवरेबाजारचा जन्मदर १४२८ असा आहे. मुलींच्या योग्य‎ शिक्षणासाठी आणि संरक्षणासाठी केंद्राने ‘बेटी बचाओ बेटी पढाओ’‎ अभियान सुरू केले आहे.‎ - डॉ. सुरेश साबळे , जिल्हा शल्यचिकित्सक, बीड.‎

असे आहेत सोनोग्राफी सेंटर्ससाठी नियम‎ गर्भवती महिलेची सोनोग्राफी करण्यापूर्वी तिचे या प्रक्रियेबाबत समुपदेशन‎ करावे. तिला समजेल अशा तिच्या मातृभाषेतील सही घेणे व ती‎ गर्भलिंगनिदान करून घेण्यास आलेली नसून ती तिच्या व बाळाच्या‎ आरोग्यासाठी सोनोग्राफी करत असल्याचे विहित नमुन्यातील संमतीपत्र‎ घ्यावे. हे संमतीपत्र तिला समजेल अशा तिच्या मातृभाषेत असणे बंधनकारक‎ आहे. त्याची एक प्रत संबंधित गर्भवती महिलेस देणे कायद्याने बंधनकारक‎ आहे. गर्भवती महिलेची सोनोग्राफी करण्यापूर्वी संबंधित डॉक्टरांनी मी गर्भाचे‎ लिंग संबंधित महिलेस सांगणार नाही, असे वचनपत्र तारीख व वेळ अचूक‎ टाकून भरावयाचे आहे. सोनोग्राफी केंद्रावर "येथे गर्भलिंगनिदान केले जात‎ नाही'' असा बोर्ड लावणे बंधनकारक आहे.‎