ऊस परिषद:फुले पिंपळगावात शुक्रवारी शेतकऱ्यांसाठी ऊस परिषद

माजलगाव तालुक्यातील फुले पिंपळगाव येथे ऊस उत्पादक शेतकरी व इतर शेतकऱ्यांसाठी ऊस परिषदेचे आयोजन करण्यात आल्याची माहिती शेतकरी संघर्ष समितीचे गंगाभिषण थावरे यांनी दिली. शेतकऱ्यांच्या प्रश्नांवर चर्चा करुन ठराव घेण्यासाठी दरवर्षी गंगाभिषण थावरे हे ऊस परिषदेचे आयेाजन करत असतात. यंदा फुले पिंपळगाव येथे ही ऊस परिषद होणार आहे.

या परिषदेत ऊसला ३ हजार रुपये भाव मिळावा, सोयाबीनला ७ हजार तर कपाशीला १० हजार रुपयांचा भाव मिळावा यासाठी ठराव घेतले जाणार आहेत. गुळ पावडर उत्पादक कारखाने जिल्ह्यात सुरु होत आहेत मात्र, हे कारखाने शुगर केन अॅक्टमध्ये येत नाहीत त्यामुळे या कारखान्यांनाही शुगर केन अॅक्टमध्ये घ्यावे अशी मागणी केली जाणार आहे.

वाढती महागाई, ऊस उत्पादनावरील वाढता खर्च, खतांचे वाढते दर, मशागतीसाठी वाढलेली मजूरी याचा विचार करुन ३ हजार रुपये दर दिला जावा अशी मागणी थावरे यांनी केली असून यासाठी ठराव घेण्यात येणार आहे.११ नोव्हेंबर रोजी होणाऱ्या या ऊस परिषदेला शेतकऱ्यांनी मोठ्या संख्येने उपस्थित राहण्याचेआवाहन गंगाभिषण थावरे यांनी केले आहे.