‎ दिव्य मराठी विशेष:राष्ट्रसंत भगवानबाबांची जन्मभूमी अाजही दुर्लक्षित‎

राष्ट्रसंत भगवान बाबा यांची जन्मभुमी‎ असलेल्या तालुक्यातील सावरगाव घाट‎ येथे दसरा मेळाव्याच्या निमित्ताने पाच‎ वर्षात भगवानभक्तीगड परिसरात मंदिर व‎ स्मारकाचा विकास झाला परंतु ज्या‎ वाड्यात संत भगवान बाबा यांचा जन्म‎ झाला तो पुरातन वाडा आजही दुर्लक्षित‎ आहे. या वाड्याचा जिर्णोद्धार कधी होतो‎ याकडे ग्रामस्थांचे लक्ष लागले आहे.‎ राष्ट्रसंत भगवानबाबा यांचे पाटोदा‎ तालुक्यातील सुपे सावरगाव हे जन्मस्थळ‎ होय.श्रावण वद्य पाच शके १८१८ (‎ सोमवार २९ जुलै, इ.स. १८९६),‎ सूर्योदयावेळी भगवानबाबांचा जन्म‎ झाला.

त्यांच्या जन्माच्या वेळी‎ वाड्यामध्ये १०८ दिवे लागल्याचे भाविक‎ सांगतात. बारशाच्या वेळी मुलाचे नाव‎ ‘आबा’ किंवा ‘आबाजी’ ठेवण्यात‎ आले. त्यामुळे भगवानबाबांचे पूर्ण नाव‎ आबाजी तुबाजी सानप होते. या गावात‎ संत भगवान बाबांचे मंदिर आहे. परंतु‎ सध्या या गावातील मुळ जन्मस्थळ‎ असलेल्या वाड्याची पडझड झालेली‎ आहे. वाड्याच्या समोरील बाजु व‎ दरवाजा शिल्लक असुन बाकीच्या भिंती‎ आणि खणाचे माळवद ढासळलेले आहे.‎ भाजपा नेत्या पंकजा मुंडे यांनी सावरगाव‎ घाट येथे दसरा मेळावा घेण्यास सुरूवात‎ केल्यानंतर राष्ट्रसंत भगवान बाबा यांचे‎ स्मारक झाले. गावांतर्गत रस्ते पाणी इतर‎ मूलभूत सुविधांसोबतच कुसळंब ते‎ मुगगाव हा मार्ग झाला.‎

पुरातन वाड्याचा जिर्णोद्धार व्हावा‎ राष्ट्रसंत भगवान बाबांचे आमच्या गावात मंदिर व‎ स्मारक ही आहे. गावात येणारे भाविक दोन्ही‎ स्थळांबरोबरच संत भगवान बाबा यांचा जन्म ज्या‎ वाड्यात झाला त्या वाड्यात जावुन दर्शन घेतात. या‎ वाड्याचा लवकरात लवकर जिर्णोध्दार व्हावा.‎ -विनायक सानप, ग्रामस्थ ,सावरगाव घाट‎ दसरा मेळाव्यामुळे राज्यात प्रसिद्ध‎ पाटोद्यापासुन २७ किलो मीटर अंतरावर सावरगाव घाट‎ येथील लोकांचा मुख्य व्यवसाय शेतीच आहे. पंकजा‎ मुंडे यांच्या दसरा मेळाव्याच्या निमित्ताने हे गाव राज्यात‎ प्रसिद्ध झाले आहे. या गाव व परिसराचा कायापालट‎ झाला आहे. भाजपच्या नेत्या पंकजा मुंडे या सत्तेत‎ असताना त्यांनी प्रयत्न करून निधीही मंजूर केला.‎