दिव्य मराठी विशेष:जालन्यात रोज 150 क्विं. चिकूची आवक‎

यंदा हवामान पोषक असल्याने चिकूचे‎ उत्पादन वाढले आहे. यामुळे‎ जालन्याच्या बाजारपेठेत दररोज १५०‎ क्विंटल चिकू दाखल होत असून‎ आठवड्याची आवक तब्बल ४५०‎ क्विंटलवर गेली आहे. सध्या नागपूर,‎ श्रीरामपूरसह पिशोरच्या चिकूचा सुगंध‎ चांगलाच दरवळला आहे. यामुळे‎ जूनपर्यंत जिल्ह्याच्या बाजारपेठेची‎ गरज भागणार आहे. ठाेकमध्ये‎ सरासरी २५ ते ३० रुपयांचा दर‎ व्यापाऱ्यांना मिळत आहे.‎

सध्या चिकूच्या बागांसाठी‎ वातावरण चांगले असल्याने‎ गुणवत्तापूर्ण फळे बाजारात दाखल‎ झाली आहेत.‎ मराठवाडा, विदर्भ तसेच खान्देश या‎ भागातील महत्त्वाची बाजारपेठ म्हणून‎ जालन्याची ओळख आहे. या‎ ठिकाणाहून भाजीपाला, फळे तसेच‎ किराणा यासह गरजेच्या वस्तूंची मोठी‎ उलाढाल होते. भाजीपाल्याच्या‎ बाबतीत वर्षभर या ठिकाणी मोठ्या‎ प्रमाणात उलाढाल सुरू राहते.‎ दरम्यान, सध्या जालन्याच्या कृषी‎ उत्पन्न बाजार समितीत मंगळवार,‎ शनिवार आणि गुरुवारी चिकूचा‎ बाजार भरवला जातो. यात गुणवत्ता,‎ फळांचा आकार यानुसार दर ठरवला‎ जातो. मेहकर, वाटूर, देऊळगावराजा,‎ राजूर या ठिकाणी हे चिकू मोठ्या‎ प्रमाणात पाठवले जातात.‎

प्रक्रियेनंतर होते विक्री‎
सध्या बाजारात दाखल होणारे चिकू‎ थेट शेतकऱ्यांकडून व्यापाऱ्यांकडे‎ दाखल होतात. दोनशे ते तीनशे किमी‎ अंतरावरून दाखल होणारा माल हा‎ काही प्रमाणात कच्च्या स्वरूपात‎ राहतो. ज्या ठिकाणी त्याची विक्री‎ होणार तेथे त्यावर प्रक्रिया करून‎ पिकवला जातो. यानंतर हे चिकू‎ विक्रीसाठी बाजारात पाठवले जातात.‎

देऊळगावराजा,‎ मेहकरहून‎ मागणी‎
जालन्याच्या बाजारातून देऊळगावराजा, मेहकर यासह स्थानिकला राजूर,‎ भोकरदन, वाटूर, अंबड आदी ठिकाणी चिकूची मागणी असल्याने माल पाठवला‎ जातो. पिशोर, नागपूर, श्रीरामपूर, कोपरगाव आदी ठिकाणचे चिकू आपल्याकडे‎ दाखल होतात. -हनीफ चौधरी, चौधरी फ्रूट कंपनी, जालना‎