दिव्य मराठी विशेष ‎:खासगी कंपन्यांत रिक्त 75 पदांसाठी आले 31 जण,‎ पात्र ठरले फक्त 23 उमेदवार; कौशल्याची वानवा‎

जिल्हा कौशल्य विकास, रोजगार व‎ उद्योजकता मार्गदर्शन केंद्रामार्फत डॉ.‎ बाबासाहेब आंबेडकर सामाजिक न्याय‎ भवनातील सांस्कृतिक सभागृहात बुधवारी‎ सकाळी ११ ते दुपारी २ वाजेपर्यंत प्लेसमेंट‎ ड्राइव्ह जागेवर निवड संधी उपलब्ध करून‎ देण्यात आली. या वेळी तीन खासगी‎ कंपन्यांमध्ये रिक्त विविध ७५ पदांसाठी‎ केवळ ३१ उमेदवारांनी मुलाखती दिल्या, तर‎ यातून केवळ २३ जणांची प्राथमिक निवड‎ झाली. यामुळे नोकरीच्या पुरेशा संधी‎ असल्या तरी कौशल्याअभावी युवकांना‎ बेरोजगार राहावे लागत असल्याचे या वेळी‎ दिसून आले.‎

नोकरीच्या शोधात असलेल्या जालना‎ जिल्ह्यातील युवक-युवतींना विविध खासगी‎ कंपन्या, कारखाने, उद्योग-व्यवसाय आणि‎ आस्थापनाकडील रोजगाराच्या संधी‎ उपलब्ध करण्याच्या उद्देशाने प्रत्येक‎ महिन्याच्या दुसऱ्या बुधवारी रोजगार‎ सहाय्यासाठी विशेष मोहीम सुरू करण्यात‎ आली आहे. पात्र उमेदवारांनी उपस्थित राहून‎ प्लेसमेंट ड्राइव्हमध्ये सहभागी व्हावे आणि‎ रोजगाराच्या या पर्वणीचा लाभ घ्यावा, असे‎ आवाहन कौशल्य विकास रोजगार व‎ उद्योजकताचे सहायक आयुक्त संपत चाटे‎ यांनी केले होते.

यासाठी भाग्यलक्ष्मी रोलिंग‎ मिल प्रा. लि. जालना यांची दहावी/बारावी/‎ पदवीधर उत्तीर्ण करिता मशीन ऑपरेटर १५‎ पदे, एमबीएसाठी एच. आर एक्झिक्युटिव्ह २‎ पदे, डिप्लोमा इंजिनिअर सिव्हिल / पदवीधर‎ (B.E/B.tech) सिव्हिल इंजिनिअरसाठी ३‎ पदे, डिप्लोमा इंजिनिअर मेकॅनिकल‎ पदवीधर (B.E/B.tech) मेकॅनिकल‎ इंजिनिअरसाठी १५ पदे आणि ज्ञानेश्वरी‎ सेक्युरिटी सर्व्हिस यांची दहावी/ बारावीसाठी‎ सुरक्षा रक्षक (पुरुष/स्त्री) १५ पदे,‎ बाऊन्सरसाठी ५ पदे, माजी सैनिकसाठी ५‎ पदे, सुपरवायझरसाठी ४ पदे अशी एकूण ६४‎ रिक्त पदे प्राप्त झाल्याचे सांगण्यात आले‎ होते. दरम्यान, भाग्यलक्ष्मी रोलिंग मिल प्रा.‎ लि., ज्ञानेश्वरी सेक्युरिटी सर्व्हिसेस व‎ फुलंब्री टेक्स्ट कॉम प्रा. लि. जालना या तिन्ही‎ कंपन्यांमध्ये एकूण ७५ जागा होत्या. मात्र,‎ इच्छुक व पात्र उमेदवार न आल्यामुळे एक‎ तृतीयांश उमेदवारांचीच निवड होऊ शकली.‎

परीक्षा, सणांमुळे अल्प प्रतिसाद‎
प्लेसमेंट ड्राइव्हबाबत भरपूर प्रचार-प्रसिद्धी‎ करण्यात आली होती. महाविद्यालयांनाही पत्र‎ पाठवले होते. मात्र कमीच प्रतिसाद मिळाला.‎ सध्या परीक्षेचा कालावधी व दोन दिवसांपूर्वी‎ होळी-धूलिवंदन सण झाल्यामुळे उमेदवारांची‎ संख्या कमी राहिली असावी. प्रत्येक‎ महिन्याचा दुसरा बुधवार ठरलेला असल्यामुळे‎ इच्छुक उमेदवारांनी नोकरीविषयक संधी व‎ अधिक माहितीसाठी विभागाच्या‎ www.rojgar.mahaswaya m.gov.in या‎ वेबसाइटला भेट द्यावी.‎ -संपत चाटे, सहायक आयुक्त, जिल्हा कौशल्य‎ विकास, रोजगार व उद्योजकता मार्गदर्शन केंद्र, जालना‎