अकस्मात‎ मृत्यू:जालन्याजवळ रेल्वेतून पडून‎ वसमतच्या जवानाचा मृत्यू‎

रेल्वेतून पडल्याने सैनिकाचा मृत्यू‎ झाल्याची घटना जालना शहरातील‎ कोडी-सारवाडी जवळ घटना‎ घडली आहे. राहुल मारोती ढगे‎ ‎ (३१, पळशी,‎ ‎ जि. हिंगोली)‎ ‎ असे मृत‎ ‎ सैनिकाचे नाव‎ ‎ आहे. ही घटना‎ ‎ रविवारी रात्रीच्या‎ ‎ सुमारास घडली‎ ‎ आहे. या प्रकरणी‎ तालुका पोलिस ठाण्यात अकस्मात‎ मृत्यूची नोंद घेण्यात आली.‎ दरम्यान, राहुल ढगे यांना रात्रीच‎ मुलगी झाली होती‌. परंतु, तिचा‎ चेहरा पाहण्या अगोदरच त्यांचा मृत्यू‎ झाला , अशी माहिती तपास‎ अधिकारी राम शिंदे यांनी दिली.‎

दहा वर्षापूर्वी राहुल सैन्य दलात‎ भरती झाले होते. ते वसमत‎ तालुक्यातील पळशी गावचे‎ रहिवासी हाेते. सोमवारी सकाळी ८‎ वाजेच्या सुमारास ते रेल्वेतून‎ पडल्याची घटना उघडकीस आली‎ आहे. राहुल ढगे हे रात्री १ वाजेच्या‎ सुमारास औरंगाबाद- पूर्णा या रेल्वेने‎ पूर्णा येथे जात असताना लोंढेवाडी‎ ते सारवाडीच्या दरम्यान रेल्वेतून‎ खाली पडले. दरम्यान, रेल्वेचे‎ कर्मचारी गस्त घालत असताना‎ अशोककुमार काळूराम वर्मा यांना ते‎ मृत अवस्थेत दिसले. तालुका‎ जालना पोलिसांनी अकस्मात‎ मृत्यूची नोंद करून मारुती ढगे‎ यांच्या उत्तरीय तपासणीसाठी‎ सामान्य रुग्णालयात मृतदेह‎ पाठविला. दरम्यान, ढगे यांचे‎ नातेवाईक दुपारच्या सुमारास‎ जालन्यात पोहोचले आणि त्यांनी‎ जवानाचा मृतदेह ताब्यात घेतला‎ आहे. त्यांच्या पश्चात आई-‎ वडील, पत्नी, दोन भाऊ, तीन‎ बहिणी असा मोठा परिवार आहे.‎ दरम्यान नातेवाइकांनी दिलेल्या‎ माहितीनुसार त्यांच्या पत्नीने रात्रीच‎ एका मुलीलाही जन्म दिल्याचे‎ सांगितले आहे. वसमत‎ तालुक्यातील पळशी या मूळ गावी‎ त्यांच्यावर मंगळवारी शासकीय‎ इतमामात अंत्यसंस्कार होणार‎ आहेत.‎