फसवणूक:ऑनलाइन फसवणूक, 24 तासांत रक्कम मिळाली परत‎

अंबड नगरपालिकेचे मुख्याधिकारी विक्रम मनडुरे‎ यांची एचडीएफसी बँकेतून २९ जानेवारी रोजी‎ सायंकाळी ६ वाजेच्या दरम्यान ८० हजार ५६ रुपये‎ वळते करून ऑनलाइन आर्थिक फसवणूक झाली‎ होती. सदर प्रकरणात तक्रारदारांनी तत्काळ जालना‎ पोलिस ठाणे सायबर येथे संपर्क करून गुन्ह्यासंबंधाने‎ माहिती दिली होती.

त्याअनुषंगाने २९ जानेवारी रोजी‎ रात्री पोलिस ठाणे सायबर येथील पोलिस अधिकारी‎ व अंमलदार यांनी तक्रारदारांनी दिलेल्या माहितीचे‎ तांत्रिक विश्लेषण केले. सदरची माहिती विविध‎ पाेर्टलकडून प्राप्त करून घेऊन तक्रारदारांची रक्कम‎ पुढे वळवण्यात आलेल्या त्या बँकेला तत्काळ‎ पत्रव्यवहार करून संबंधित नोडल अधिकाऱ्यांंशी‎ संपर्क केला. सदर रक्कम परत करण्याबाबत कळवले‎ होते.

संबंधित बँकेला सतत पाठपुरावा करून‎ तक्रारदारांची फसवणुकीद्वारे वळवलेली रक्कम ही‎ २४ तासांच्या आत तक्रारदाराच्या खात्यामध्ये मूळ‎ स्वरूपात परत प्राप्त झाली आहे. तक्रारदारांना पैसे‎ लगेचच परत मिळाल्यामुळे पोलिसांच्या‎ कार्यवाहीबाबत त्यांनी समाधान व्यक्त केले आहे.‎ सदर कामगिरी पोलिस अधीक्षक डॉ. अक्षय शिंदे,‎ पोलिस उपअधीक्षक इंदलसिंग बहुरे यांच्या‎ मार्गदर्शनाखाली पोलिस ठाणे सायबरचे पोलिस‎ निरीक्षक मारुती खेडकर, अंमलदार लक्ष्मीकांत‎ आडेप, किरण मोरे यांनी केली आहे.‎