उज्ज्वला लाभार्थ्यांना फायदा:गॅस सिलिंडरच्या दरात कपात करून सबसिडी सुरू करावी‎

केंद्र व राज्य सरकारने नुकतीच‎ व्यावसायिक गॅस सिलिंडरच्या दरात‎ ९९ रुपयांनी कपात केली आहे.‎ तसेच उज्ज्वला गॅस योजनेतून २००‎ रुपयांची सबसिडी देण्यात आली‎ आहे. परंतु, घरगुती गॅस‎ सिलिंडरच्या दरात कमी करून‎ त्यावरील बंद केलेली सबसिडी‎ पुन्हा एकदा सुरू करावी, अशी‎ मागणी सर्वसामान्यांतून केली जात‎ आहे.‎ मागील तीन वर्षांपासून मिळणारी‎ गॅस सबसिडी सरकारकडून सध्या‎ बंद करण्यात आली आहे. त्यातच‎ दिवसेंदिवस जीवनावश्यक वस्तूंच्या‎ वाढत्या किमती, विजेचे वाढणारे‎ बिल यामुळे सर्वसामान्यांचे‎ महिन्याचे आर्थिक गणित बिघडले‎ आहे. आता जगावे तरी कसे हाच‎ प्रश्न त्यांना सतावत आहे.

याबाबत‎ शासनाने निर्णय घेणे आवश्यक‎ आहे. उज्ज्वला योजनेंतर्गत‎‎‎‎‎‎‎‎ स्वयंपाकाच्या गॅसवर प्रति सिलिंडर‎ २०० रुपयांची सबसिडी देण्याची‎ घोषणा केंद्र सरकारने केली.‎ देशातील ९ कोटी ५९ लाख‎ उज्ज्वला लाभार्थ्यांना याचा फायदा‎ होत आहे. ही सबसिडी १ मार्च २०२३‎ ते १ मार्च २०२४ पर्यंत असणार आहे.‎ वर्षभरात या योजनेतील लाभार्थ्यांना‎ १२ सिलिंडर मिळणार आहेत. केंद्र‎ सरकारच्या या निर्णयाने‎ सर्वसामान्यांना दिलासा मिळाला‎ असल्याचे माजी नगराध्यक्षा आशा‎ माळी यांनी सांगितले. तर बस हो गई‎ महगाई की मार, अबकी बार मोदी‎ सरकार'' अशा निवडणुकीतील‎ घोषणा फोल ठरल्या आहेत.

घरगुती‎ गॅस दरवाढीमुळे सर्वसामान्यांचे‎ जगणे कठीण झाले आहे. सरकारने‎ यावर काहीतरी उपाययोजना‎ करावी, अशी मागणी राष्ट्वादी‎ महिला आघाडीच्या तालुकाध्यक्षा‎ डॉ. सुनिता सावंत यांनी केली आहे.‎ जुलै २०२१ पासून तब्बल पाचवेळा‎ गॅसची दरवाढ झाली आहे. यामुळे‎ खर्चाचे नियोजन बिघडले आहे.‎ त्यात नुकतेच वीज दरही वाढले‎ आहेत.