दिव्य मराठी विशेष:यंदा विद्यार्थ्यांना घेता येईल शैक्षणिक सहलीचा आनंद‎

पर्यटन धोरणाला चालना‎ मिळण्यासाठी शालेय शिक्षण‎ विभागांतर्गत शैक्षणिक सहलीचे‎ आयोजन केले जाते. इयत्ता ५ वी ते‎ दहावीच्या विद्यार्थ्याना ऐतिहासिक‎ विषयाचे ज्ञान मिळावे, भौगौलिक,‎ सांस्कृतिक व शैक्षणिक गोष्टी‎ प्रत्यक्षात पाहण्यास मिळाव्यात व‎ त्यांची माहिती मिळावी यासाठी‎ शैक्षणिक वर्षात एक शैक्षणिक‎ सहल, अथवा ग्रामीण पर्यटनाला‎ परवानगी शिक्षण विभागाने दिली‎ आहे. कोरोना काळात मागील दोन‎ वर्षांपासून विद्यार्थ्यांना सहलीला‎ जाता आले नाही. यावर्षी हा मार्ग‎ खुला झाला असून जास्तीत जास्त‎ दोन मुक्कामाला परवानगी देण्यात‎ आली आहे.‎

शालेय सहलीसाठी तालुका‎ पातळीवरून परवानगी देण्यात‎ येणार आहे. सहलीदरम्यान‎ कुठल्याही प्रकारचा निष्काळजीपणा‎ होऊ नये व त्यामुळे अनुचित प्रकार‎ घडू नये यासाठी अटी शर्ती लागू‎ करण्यात आल्या आहेत. यासाठी‎ एसटी महामंडळाच्या बसेसची‎ निवड करण्याचे अधिकार देण्यात‎ आले आहे. महिला शिक्षिका‎ विद्यार्थीनींसोबत राहतील याची‎ सक्ती करण्यात आली आहे. समुद्र‎ किनारे, बीच अतिजोखमीची‎ पर्वतावरील ठिकाणी, नदी, तलाव,‎ विहिरी तसेच उंच टेकड्या इत्यादी‎ ठिकाणी शैक्षणिक सहलीचे‎ आयोजन करताना पुरेशी काळजी‎ घ्यावी.

विद्यार्थ्यांना गडकिल्ले‎ दाखविण्यात यावे. विद्यार्थ्यांना‎ सहलीसाठी नेणार असल्यास‎ सोबत प्रथमोपचार पेटी असावी‎ स्थानिक डॉक्टरांचे तसेच जेथे‎ सहल जाणार आहे तेथील‎ शासकीय रुग्णालयाचे संपर्क‎ क्रमांक सोबत ठेवावे. सहलीचे‎ नियोजन करतांना त्याचा आराखडा‎ पालकांपर्यंत पोहचवला जावा‎ पालकाच्या सूचनाही विचारात‎ घ्याव्यात तसेच गरज भासल्यास‎ पालकाचा एक प्रतिनिधी सहलीस‎ सोबत ठेवावेत. सहलीला‎ निघण्यापूर्वी विद्यार्थ्यांच्या‎ पालकांकडून संमतीपत्र घेणे‎ बंधनकारक राहिल.‎

लालपरीचा सहलीला हातभार‎
एसटी महामंडळाच्या लालपरीकडून शैक्षणिक सहलीसाठी विशेष अशी‎ सूट देण्यात येते. या वर्षीही सहलीसाठी बसेस उपलब्ध करून देण्यात‎ येणार असून विद्यार्थ्यांसाठी सवलतींवर बसेस उपलब्ध करून देण्यात‎ येणार असल्याचे एसटीच्या अधिकाऱ्यांनी सांगितले.

‎विद्यार्थिनींसाठी महिला शिक्षक अनिवार्य‎
सहलीत विद्यार्थिनींचा सहभाग असल्यास महिला शिक्षिका तसेच शक्यतो‎ एक महिला पालक प्रतिनिधी बरोबर असणे आवश्यक राहील. सहलीत‎ शाळेचे विद्यार्थी, शिक्षक, शाळेचे नामनिर्देशित केलेला पालक प्रतिनिधी‎ (शिक्षक पालक संघ सभासद) यांच्या व्यतिरिक्त बाहेरील कोणाचाही‎ समावेश राहणार नाही. रेल्वे क्रॉसिंगवरून बस नेताना शिक्षकांनी सावधगिरी‎ बाळगावी. रात्रीच्या वेळी प्रवास टाळावा. याचे नियोजन शिक्षकांवर‎ सोपवण्यात आले आहे.‎