ग्वाही:जालना साखर कारखाना पूर्ववत सुरू‎ करण्यासाठी पुढाकार घेणार ; गाेरंट्याल‎

ऊस उत्पादक शेतकरी, सभासद‎ आणि कामगारांच्या हितासाठी जालना ‎सहकारी साखर कारखाना पूर्ववत सुरू ‎करण्यासाठी पुढाकार घेणार‎ असल्याची ग्वाही आमदार कैलास ‎ ‎ गोरंट्याल यांनी दिली.‎ कारखाना सभासद‎ शेतकरी,कामगार बचाव कृती‎ समितीच्या वतीने कारखाना क्षेत्रातील‎ गावांमध्ये आ. गोरंट्याल यांच्या‎ नेतृत्वाखालील आणि मुख्य संयोजक‎ संजय लाखे पाटील यांच्या‎ मार्गदर्शनाखाली जनजागरण मोहीम‎ हाती घेण्यात आली आहे.‎

शुक्रवारपासून वाघ्रळ जहागीर येथून‎ या मोहिमेचा शुभारंभ करण्यात आला‎ आहे. त्यानंतर नेर आणि रामनगर येथे‎ ऊस उत्पादक शेतकरी, सभासद,‎ कामगार आणि परिसरातील‎ शेतकऱ्यांच्या बैठका घेण्यात आल्या.‎या बैठकीत मार्गदर्शन करतांना‎ आ.गोरंटयाल बोलत होते. यावेळी‎ डॉ.संजय लाखे पाटील, अंकुशराव‎ राऊत, डी.के.मोरे, सुरेशराव खडके,‎ कमलाकर अंभोरे, राम सावंत, वसंत‎ जाधव, ज्ञानेश्वर कदम, सुभाष‎ कोळकर, नारायण वाढेकर, अरुण‎ घडलींग, दत्ता घुले, रमेश गजर, बाळू‎ गजर आदींची उपस्थिती होती.‎

आ. गोरंट्याल म्हणाले, जालना‎ आणि बदनापूर या दोन तालुक्यातील‎ ऊस उत्पादक शेतकऱ्यांची गरज‎ लक्षात घेऊन माजी खा. बाळासाहेब‎ पवार यांनी पाठपुरावा करून रामनगर‎ येथे जालना सहकारी साखर‎ कारखान्याची उभारणी केली. इतकेच‎ नाही तर त्यांनी सदर कारखाना हा‎ चांगल्या पद्धतीने चालवून देखील‎ दाखवला. त्यामुळे कारखाना‎ क्षेत्रातील शेतकऱ्यांसह ऊस उत्पादक‎ शेतकरी, कामगार आणि सभासदांना‎ दिलासा मिळाला होता.‎

खोतकर यांनी कारखाना हडपल्याचा आरोप‎
मुख्य संयोजक डॉ.संजय लाखे पाटील यांनी आपल्या भाषणात माजी‎ राज्यमंत्री अर्जुन खोतकर यांच्यावर गंभीर आरोप करत कारखाना कशा‎ पद्धतीने हडप करण्याचा प्रयत्न केला जात आहे, याबद्दल मार्गदर्शन केले.‎ कारखाना बचाव कृती समितीच्या वतीने आयोजित जनजागरण बैठकीस‎ उत्स्फूर्त प्रतिसाद मिळत असल्याचेही लाखे म्हणाले.‎