वितरण:दहावीचे हॉलतिकीट संकेतस्थळावर उपलब्ध

विद्यार्थ्यांना दहावीच्या परीक्षांचे हॉलतिकीट ६ फेब्रुवारी रोजी दुपारी १ वाजता शाळेच्या लाॅगिनमध्ये उपलब्ध करून दिल्याची माहिती राज्य मंडळाने दिली आहे. माध्यमिक आणि उच्च माध्यमिक शिक्षण मंडळाच्या वतीने घेण्यात येणाऱ्या दहावीच्या लेखी परीक्षेस २ मार्चपासून सुरुवात होणार आहे. तत्पूर्वी २० फेब्रुवारीपासून प्रात्यक्षिक परीक्षांना सुरुवात होत आहे. या परीक्षेसाठी आवश्यक असलेले हॉलतिकिटाचे वितरण विद्यार्थ्यांना शाळांनी करावे. ६ फेब्रुवारी रोजी शाळांच्या लॉगिनमध्ये हॉलतिकीट डाऊनलोड करून घेण्यास सुरुवात झाली. अधिक माहितीसाठी www.mahahsscboard.in या संकेतस्थळावर भेट द्यावी.

हॉलतिकिटाची ऑनलाइन प्रिंट देताना शाळांनी कोणत्याही प्रकारचे शुल्क आकारू नये. हाॅलतिकीट प्रिंटवर मुख्याध्यापकांची सही व शिक्का असावा. हॉलतिकिटात विषय व माध्यम बदल असल्यास त्यांच्या दुरुस्त्या शाळांनी विभागीय मंडळात जाऊन करून घ्याव्यात. फोटो, स्वाक्षरी, विद्यार्थ्यांचे नाव, जन्मतारीख आणि जन्मस्थळासंदर्भातील दुरुस्त्या शाळांनी त्यांच्या स्तरावर करून त्याची एक प्रत मंडळाकडे पाठवावी, असे राज्य मंडळाच्या सचिव अनुराधा ओक यांनी म्हटले आहे.