कृषिमंत्रांच्या जिल्ह्यात आठवड्यात 6 आत्महत्या‎:कृषिमंत्री अब्दुल सत्तार यांच्या राजीनाम्याची माजी खासदार चंद्रकांत खैरे यांची मागणी‎

एकीकडे बेरोजगारीमुळे तरुण त्रस्त‎ असताना शेतकरी अस्मानी संकटात‎ सापडला आहे. अवकाळी पावसाने‎ दाणादाण उडाल्याने गहू, मका, हरभरा,‎ भाजीपाला, फळबागा आदींचे नुकसान‎ झाले आहे. राज्याच्या कृषिमंत्र्यांच्या‎ छत्रपती संभाजीनगर जिल्ह्यात‎ आठवड्यात ६ शेतकऱ्यांनी आत्महत्या‎ केल्या आहेत.

एकट्या सिल्लोडमध्ये ३‎ जणांनी जीवन संपवले, तर पालकमंत्री‎ संदिपान भुमरे यांच्या मतदारसंघात दोन‎ शेतकऱ्यांनी आत्महत्या केल्या आहेत.‎ कापसाचे भाव पडले असून त्यावर‎ कृषिमंत्री अब्दुल सत्तार बोलण्यास तयार‎ नाहीत. वाढत्या आत्महत्यांची नैतिक‎ जबाबदारी घेत कृषिमंत्री सत्तार यांनी‎ राजीनामा द्यावा, अशी मागणी शिवसेना नेते‎ चंद्रकांत खैरे यांनी केली.‎ खैरे यांनी कन्नड तालुक्यातील पिशोर,‎ शफेपूर, भिलदरी, आंबा, उपळा आदी‎ गावांत त्यांनी नुकसानग्रस्त पिकांची पाहणी‎ केली. या वेळी उपजिल्हाप्रमुख अवचित‎ वळवले, तालुकाप्रमुख संजय मोटे, तालुका‎ संघटक डॉ. अण्णासाहेब शिंदे यांची‎ उपस्थिती होती.‎ सत्तार बांधावर का येत नाहीत?‎

खैरे म्हणाले की, अवकाळी पावसामुळे‎ शेतकऱ्यांचे मोठे नुकसान झाले आहे.‎ शेतकरी आत्महत्या करत आहेत. मात्र,‎ कृषिमंत्री अब्दुल सत्तार कुठे आहेत? ते‎ बांधावर पाहणी करण्यास का येत नाहीत?‎ शेतकऱ्यांचा कापूस घरात पडून आहे.‎ कापसाला किडे लागले असून, त्याचा‎ शेतकऱ्यांना त्रास होत आहे. कापसाचे भाव‎ घसरत असून, कृषिमंत्री मात्र यावर‎ बोलायला तयार नाहीत.