आत्महत्या:मयूर पार्कमध्ये 44 वर्षीय शिक्षिकेने घेतला गळफास

शुक्रवारी रात्री एका उच्चशिक्षित प्राध्यापिकेने आत्महत्या केल्याची घटना ताजी असतानाच रविवारी पुन्हा एका शिक्षिकेने गळफास घेत आत्महत्या केली. सोनाली सुधाकर चांदवडकर-चव्हाण (४४) असे तिचे नाव आहे. त्यांच्या आत्महत्येचे कारण मात्र समजू शकले नाही. सोनाली व त्यांचे पती जिल्हा परिषदेच्या लाडसावंगी शाळेत शिक्षक आहेत. अभियंता असलेली मुलगी व चौथीत शिकणाऱ्या मुलासह त्या मयूर पार्कमध्ये राहत हाेत्या. रविवारी सुटी असल्याने चौघेही घरीच होते. सकाळी त्यांनी नाष्ट्यासाठी पोहे तयार केले. सर्वांनी साेबत नाष्टा केला. त्यानंतर घरकाम करून सोनाली अचानक त्यांच्या खोलीत गेला. तेव्हा पती, दोन्ही मुले घरातच होते. दुपारी त्यांचा मुलगा आईला शोधत वरच्या मजल्यावर गेला. दरवाजा बंद असल्याने त्याने वारंवार आवाज दिला.

मात्र, आई प्रतिसाद देत नसल्याचे त्याने वडिलांना सांगितले. पतीने आवाज देऊनही प्रतिसाद येत नसल्याने त्यांनी दरवाजाला धक्का दिला असता सोनालींनी गळफास घेतल्याचे दिसले. त्यांना तत्काळ रुग्णालयात नेले. मात्र, डाॅक्टरांनी तपासून मृत घाेषित केले. पोलिसांच्या प्राथमिक चौकशीत कुठलाही वाद समाेर आला नाही. त्यांच्या आत्महत्येच्या कारणाचा तपास सुरू असल्याचे पोलिस नाईक सलीम हमीद सय्यद यांनी सांगितले.