28.1% वाढीसह दारू विक्री:दारू विक्रीतून 4 हजार 14 कोटी रुपयांचा महसूल जमा

यंदा एकट्या औरंगाबाद जिल्ह्याने दारू विक्रीचे ९६ टक्के लक्ष्य पूर्ण करत ५४ लाख ५४ हजार २२५ बल्क लिटर दारू रिचवली. त्यासोबतच एकट्या औरंगाबाद जिल्ह्याकडून तब्बल ४ हजार १४ कोटी रुपयांचा महसूल राज्याच्या तिजोरीत जमा झाला असून मार्चअखेरपर्यंत ४ हजार १६६ कोटींचे लक्ष्य राज्य उत्पादन शुल्क विभागाचे असून ते लवकरच पूर्ण होईल, असे पोलिस अधीक्षक संतोष झगडे यांनी सांगितले.

कोरोनाच्या तीन वर्षांमध्ये राज्याच्या एकूण दारू विक्री व निर्मितीवर सर्वाधिक परिणाम झाला. २०१६ ते २०२० पर्यंत एकूण विक्रीमध्ये सर्वाधिक ३२ टक्क्याने दारू विक्री व निर्मिती कमी झाली. परिणामी, राज्याला सर्वाधिक महसूल देणारा विभागच मागे पडल्याने राज्याच्या तिजोरीलाही त्याची झळ बसली. मात्र, कोरोना सरताच २०२१ मध्ये कमी झालेला महसूल सहा टक्क्यांपर्यंत पोहोचला. २०२२-२३ मध्ये मात्र २८.१ टक्क्यांनी महसुलात समाधानकारक वाढ झाल्याचे अधिकाऱ्यांनी सांगितले.

गोदावरीचे पाणी मद्य व बिअरनिर्मितीला अनुकूल असल्याने भविष्यात आणखी कंपन्या औरंगाबादला प्राधान्य देण्याची शक्यतादेखील अधिकाऱ्यांनी व्यक्त केली. अधीक्षक झगडे यांनी दिलेल्या माहितीनुसार, मार्चअखेरपर्यंत ५ हजार २७५ कोटी रुपयांच्या महसुलाचे यंदाचे लक्ष्य आहे. जानेवारी २०२३ पर्यंत गतवर्षीच्या तुलनेत १ हजार ८४ कोटींचा अधिक महसूल विभागाला प्राप्त झाला आहे.