राजकारण:कृषी उत्पन्न बाजार समिती निवडणूक, 181 जण संचालक पदासाठी निवडणुकीच्या रिंगणात

जाधववाडी कृषी उत्पन्न बाजार समितीच्या 18 संचालक निवडण्यासाठी निवडणूक प्रक्रिया राबवण्यास सुरुवात झाली आहे. 3 ते 5 एप्रिल दरम्यान उमेदवारी अर्ज भरण्यासाठी वेळ देण्यात आला होता. 6 एप्रिलला अर्ज स्विकृती व अस्विकृत उमेदवारांची यादी प्रसिद्ध झाली आहे.

त्यानुसार संचालक होण्यासाठी दोनशे जणांनी उमेदवारी अर्ज भरले होते. त्यापैकी 19 अर्ज अस्विकृत झाली. त्यांनाही दाद मागण्यासाठी वेळ देण्यात आली आहे. तर 181 उमेदवार निवडणुकीसाठी पात्र ठरले आहेत. आजी माजी संचालक रिंगणात उतरलेले आहेत. त्यामुळे निवडणुकीची रंगत चांगलीच वाढत चालली आहे.

संचालक मंडळाची मुदत 2020 मध्येच संपली होती. मात्र, कोरोना महामारीमुळे त्यांना मुदत वाढ देण्यात आली होती. त्यानंतर प्रशासकही नियुक्त करण्यात आले होते. भाजप व महाविकास आघाडी असे दोन्ही पक्षांच्या उमेदवारांनी सत्ता उपभोगली आहे. आता निवडणूक कार्यक्रम जाहीर झाल्या असून बाजार समितीवर सत्ता मिळवण्यासाठी युती व महाविकास आघाडीच्या वतीने पूर्ण ताकदीने प्रयत्न सुरु झाले आहेत.

गत निवडणुकीत संजय औताडे व राधािकसन पठाडे यांनी सत्ता समीकरणच बदलून टाकले होते. लॉटरी पद्धतीने निकाल लागला होता. ते दोघेही निवडणुकीच्या रिंगणात आहेत. त्यामुळे जगन्नाथ काळे यांचा अर्ज जरी अस्विकृत झाला असला तरी निवडणुकीतील रंगत आणखी वाढली आहे.

21 एप्रिलाला मैदानातील खरे पैलवान कळतील

संचालक होण्यासाठी यंदा इच्छुकांची बाऊ गर्दी झाली आहे. मात्र, 20 एप्रिल पर्यंत अर्ज मागे घेण्यासाठी वेळ देण्यात आला आहे. या कालावधीत पट्टीचे राजकारणी अनेकांना अर्ज मागे घेऊन आपल्या गोटात आणण्यासाठी शर्यतीचे प्रयत्न करतील. म्हणजेच 21 एप्रिलला अंतिम यादी प्रसिद्ध होईल. निवडणुकीच्या मैदानातील खरे पैलवान कोण हे मतदारांनाही कळेल.

मतदार संघनिहाय स्विकृत उमेदवारी अर्जांचा आलेख

मतदार संघाचे नाव उमेदवार अर्ज

सहकारी संस्था सर्वसाधारण मतदार संघ 63

सहकारी संस्था महिला राखीव 15

सहकारी संस्था इतर मागासवर्ग 10

सहकारी संस्था वि.जा./भ.ज. 13

ग्रामपंचायत सर्वसाधारण 27

ग्रामपंचायत आर्थिक दुर्बल घटक 08

ग्रामपंचायत अनु जाती जमाती 15

व्यापारी 21

हमाल 08