सिडको पोलिसांनी केली अटक:किराडपुरा येथे 10 वर्षीय मुलीसोबत अश्लिल प्रकार करण्याचा प्रयत्न

दुकानात खरेदी करण्यासाठी गेलेल्या दहा वर्षीय मुलीला वस्तू देण्याच्या बहाण्याने जवळ बोलावून ३५ वर्षीय वसीम अन्वर बेग (३५, रा. गल्ली नंबर १०, रहेमानिया कॉलनी, किराडपुरा ) या विकृताने अश्लील प्रकार करण्याचा प्रयत्न केला. मुलीने आईला घरी जाऊन हा प्रकार सांगितल्यानंतर तिने घटनास्थळी धाव घेत जाब विचारला. स्थानिकांना हा प्रकार कळताच जमावाने त्याला चोप देऊन सिडको पोलिसांच्या ताब्यात दिले.

घरापासून जवळच असलेल्या किराणा दुकानात १० वर्षीय मुलगी तेल आणण्यासाठी गेली होती. जवळच महिलांच्या बांगड्या व वस्तूंची गाडीवर विक्री करणाऱ्या वसीमची नजर मुलीवर पडली. त्याने तिला वस्तू घेण्याचा आग्रह करून जवळ बोलावले. मुलीने नकार देताच त्याने बळजबरी तिला स्वत:कडे ओढत अश्लील चाळे सुुरू केले. घाबरलेल्या मुलीने आरडाओरड करण्याचा प्रयत्न करत सुटका करून घर गाठले. मुलगी रडायला लागल्याने आईने विचारपूस केली.

तेव्हा तिने घडलेला प्रसंग आईला सांगितला. निरीक्षक संभाजी पवार, सहायक निरीक्षक श्रद्धा वायदंडे यांनी मुलीची विचारपूस केली. तेव्हा घटना खरी असल्याचे स्पष्ट झाले. त्यानंतर तिच्या आईच्या तक्रारीवरून वसीमविरोधात बाललैंगिक अत्याचार कलमांतर्गत गुन्हा दाखल करण्यात आला. तपास अधिकारी सहायक निरीक्षक वायदंडे यांनी त्याला गुरुवारी न्यायालयात हजर केले. न्यायालयाने त्याला २ दिवसांची पोलीस कोठडी सुनावली.