आपल्या शहरातील ताज्या बातम्या आणि ई-पेपर मिळवा मोफत

Install App

ADS Free बातम्या वाचण्यासाठी आताच इंस्टॉल करा दिव्य मराठी अ‍ॅप

अजब कारभार:पालिका प्रशासन म्हणते : काँटॅक्ट ट्रेसिंग सर्वत्र सुरू नागरिक म्हणतात : आमच्याकडे कुणी आलेच नाही...

21 दिवसांपूर्वी
  • कॉपी लिंक
  • कोरोनाचा उद्रेक वाढला, एका रुग्णामागे 20 लोकांना होत आहे संसर्ग, तरीदेखील यंत्रणा सुस्त

गेल्या वर्षी एखादा रुग्ण आढळला तर लगेचच तो परिसर प्रतिबंधित क्षेत्र म्हणून वेगळा केला जात होता. एवढेच नाही तर परिसर सॅनिटाइज करून पाठोपाठ कुटुंब आणि संपर्कातील व्यक्तींची चाचणीही केली जात होती. मात्र, फेब्रुवारी २०२१ पासून अचानक रुग्णसंख्या वाढायला सुरुवात झाली. तरीदेखील ना कुटुंबाची चाचणी होतेय, ना संपर्कातील व्यक्तींची चाचणी केली जातेय. यामुळे रुग्णसंख्येचा स्फोट होताना दिसत आहे. शासकीय माहितीनुसार एक रुग्ण किमान २२ जणांना संक्रमित करतो. काँटॅक्ट ट्रेसिंग सुरू असल्याचा प्रशासनाचा दावा आहे. तर नागरिक म्हणतात, ‘आम्हाला कुणीच विचारले नाही. काँटॅक्ट ट्रेसिंग सुरू असते तर रुग्णसंख्या आणखी वाढलेली दिसली असती...’ कोरोनाचा उद्रेक वाढलेला असताना प्रशासकीय यंत्रणेच्या सुविधा तोकड्या असल्याचे डीबी स्टार पाहणीत आढळले आहे.

१५ मार्च २०२० रोजी शहरात कोरोनाचा पहिला रुग्ण आढळला. ही महिला रुग्ण कार्यरत असलेल्या हॉटेल मॅनेजमेंट संस्थेतील ४५० विद्यार्थी आणि संपर्कातील जवळपास ३० जणांची एकदा नव्हे, दोनदा नव्हे तर तीनदा तपासणी करण्यात आली होती. त्या वेळी सुदैवाने कुणीही पॉझिटिव्ह आढळले नाही. त्यानंतर हळूहळू कोरोनाने शहरात पाय पसरले आणि कोरोनाचा उद्रेक वाढतच गेला. त्यामुळे १२ मे २०२० रोजी आरोग्यमंत्री राजेश टोपे यांनी टास्क फोर्सची स्थापना करण्याच्या सूचना दिल्या. सप्टेंबर २०२० पर्यंत ही टीम युद्धपातळीवर काँटॅक्ट ट्रेसिंग करतही होती. ४५० ते ५०० रुग्ण असताना काँटॅक्ट ट्रेसिंगमुळे कोरोना नियंत्रणात आणण्यात बऱ्यापैकी यश आले. आज शहरात दररोज १७०० च्या घरात रुग्ण सापडत आहेत. त्यांच्या संपर्कातील व्यक्तींची चाचणी केली तर किमान ३४ हजारांची चाचणी व्हायला हवी. यातील किमान १७ ते २० हजार पॉझिटिव्ह येऊ शकतात. मात्र, काँटॅक्ट ट्रेसिंग बंद असल्याने बाधितांची संख्या कमी दिसत आहे. ट्रेसिंग सुरू असेल तर रुग्णसंख्या २० पट अधिक दिसण्याची भीती आहे.

विभागातील रुग्णसंख्या (२९ मार्चपर्यंत)
औरंगाबाद जिल्हा : एकूण ८११८१, सध्या उपचार घेत असलेले : २१२८२
जालना जिल्हा : २२५९५ (एकूण), ५९५ (उपचार घेणारे)
हिंगोली जिल्हा : ६६३२ (एकूण), १६८२ (उपचार घेणारे)
परभणी जिल्हा : १३३०९ (एकूण), ३९४७ (उपचार घेणारे)

काँटॅक्ट ट्रेसिंग सुरू आहे
टास्क फोर्स विसर्जित केला असला तरीही काँटॅक्ट ट्रेसिंग सुरू आहे. बाधितांच्या संपूर्ण कुटुंबाची तपासणी केली जात आहे. संपर्कातील व्यक्तींनाही चाचणीसाठी बोलावले जात आहे. आशा सेविका आणि शिक्षक त्यासाठी काम करत आहेत. - डॉ. बाळकृष्ण राठोडकर, प्रभारी आरोग्य अधिकारी, मनपा

या आहेत मार्गदर्शक सूचना
एक रुग्ण २० ते २२ जणांना संक्रमित करतो. साधारणतः ५ दिवसांत संपर्कातील व्यक्तींना लक्षणे दिसू लागतात. त्यामुळे ३ ते ५ दिवसांनी त्यांची चौकशी किंवा चाचणी करायला हवी.

डीबी स्टार चमूने विविध भागांतील रुग्णांशी संपर्क केला असता प्रत्येक जण काँटॅक्ट ट्रेसिंग झाली नसल्याचे सांगत होता.

सर्व नावे बदललेली आहेत...

  • साहिल - मी सूतगिरणी चौकात राहतो. ६ दिवसांपूर्वी मला कोरोना झाला. मात्र, माझ्या कुटुंबाची किंवा परिसरातील नागरिकांची तपासणी, सॅनिटायझेशनसाठी मनपाकडून कुणीही विचारले नाही.
  • अनघा - दहा दिवसांपूर्वी माझ्या पतीला कोरोनाची लागण झाली. त्याच वेळी आम्ही स्वत:हून चाचणी केली. मी पॉझिटिव्ह निघाले. उर्वरित निगेटिव्ह आले. तरीही प्रशासनाकडून काँटॅक्ट ट्रेसिंग झाली नाही.
  • आसावरी - गेल्या वर्षीप्रमाणे आता मनपाकडून कुणीही येत नाही. आमच्या आदिनाथनगरात रुग्ण असल्याचे कळल्यावर त्यांच्या संपर्कातील ज्या व्यक्तींना लक्षणे जाणवली त्यांनी स्वतःहून चाचणी केली.
  • राहुल - मी आठ दिवसांपूर्वी कोरोना पॉझिटिव्ह आलो होतो. मी सिडको एन-११ मध्ये राहतो. चाचणी पॉझिटिव्ह आल्यावर कुणाच्या संपर्कात आलो आहे का, एवढीच विचारणा मला करण्यात आली.
  • गणेश - मी सिडको एन-६ भागात राहतो. १० दिवसांपूर्वी माझी चाचणी पॉझिटिव्ह आली होती. मात्र, कुणीही माझ्या कुटुंबातील किंवा संपर्कातील लोकांच्या चाचणीसाठी विचारणा केली नाही.
बातम्या आणखी आहेत...