जन्म ते मृत्यू या प्रवासाचं नाव आयुष्य!:कोरोनाने नेले एक हजार जीव, तर 6000 चिमुकले नव्याने आले अंगणात!

मागता जे ना मिळे, टाळल्याने ना टळे, जीवमात्रा सोडिना हे, जन्म-मृत्यूचे जुळे! - ग.दि. माडगूळकर

गेल्या सहा महिन्यांत कोरोनाने जिल्ह्यातील एक हजार कर्तबगार पुरुष, महिला, तरुणांना अकाली हिरावून नेले. कुणाच्याही मृत्यूचे दु:ख अपार असते. पण यातून सावरत भविष्याकडे आशादायी नजरेने पाहणे तितकेच गरजेचे असते. याच ६ महिन्यांत एकट्या ‘घाटी’त ६ हजारांवर नवे जीव जन्मालाही आले. मृत्यू अपरिहार्य असला तरी भवितव्याची आशा त्यामुळे संपत नाही. ‘उज्ज्वल त्याची पाहा प्रभावळ दूर मनोऱ्यात, अन् लावा हृदयात सख्यांनो आशेची वात...’ ही आशेची वात हृदयात लावत आपल्याला पुढे जायचे आहे!