अंबादास दानवेंना पोलिसांनी घेतले ताब्यात:औरंगाबादेत ठाकरे गटाचे चक्काजाम आंदोलन; वीजबिल सक्ती, पीकविम्यावरून आक्रमक

शेतकऱ्यांना करण्यात आलेली वीजबिलाची सक्ती व पीक विमा कंपन्यांविरोधात ठाकरे गटाने औरंगाबादेत ठिकठिकाणी चक्काजाम आंदोलन पुकारले आहे. आंदोलनादरम्यान विधान परिषदेचे विरोधी पक्षनेते अंबादास दानवे यांना पोलिसांनी ताब्यात घेतले आहे.

मार्गावर वाहतूक कोंडी

औरंगाबाद-नगर रोडवर ईसारवाडी फाट्याजवळ अंबादास दानवे यांच्या नेतृत्वाखाली सकाळी 10 वाजेपासून चक्का जाम आंदोलन पुकारण्यात आले होते. ठाकरे गटाच्या कार्यकर्ते मोठ्या संख्येने आंदोलनात सहभागी झाले. पुण्याकडे जाणारा हा महत्त्वाचा रस्ता असल्याने आंदोलनामुळे येथे मोठी वाहतूक कोंडी झाली होती. पोलिसांनी हस्तक्षेप करत अंबादास दानवेंची समजूत घालण्याचा प्रयत्न केला. मात्र, अंबादास दानवे आंदोलनावर ठाम होते. त्यामुळे अखेर पोलिसांनी अंबादास दानवेंसह कार्यकर्त्यांना ताब्यात घेतले.

रब्बी पीक हातचे जाईल

यावेळी अंबादास दानवे म्हणाले की, यंदा पाऊस चांगला झाल्यामुळे शेतकऱ्यांना रब्बी पीक चांगले येण्याची अपेक्षा आहे. मात्र, वीजबिल सक्तीच्या नावाखाली शेतकऱ्यांचे वीज कनेक्शन कट केले जात आहे. त्यामुळे एका शेतकऱ्याने आत्महत्या केल्याचेही समोर आले आहे. या स्थितीकडे सरकारने उघड्या डोळ्यांनी पहावे, यासाठी आम्हाला रस्त्यावर उतरावे लागले आहे.

...तर आंदोलनाच्या पुढे जाऊ

अंबादास दानवे म्हणाले की, सरकार शेतकऱ्यांसाठी असल्याचे म्हटले जाते. मात्र, सध्या केवळ पीक विमा कंपन्यांची दादागिरी सुरू आहे. सरकारने वेळीच यात सुधारणा न केल्यास आंदोलनाच्या पुढचे पाऊल उचलू, असा इशाराही अंबादास दानवेंनी दिला.

मंत्री खोके घेण्यात व्यस्त- खैरे

याशिवाय औरंगाबाद-मनमाड रस्त्यावर चंद्रकांत खैरे यांच्या नेतृत्वाखाली आंदोलन सुरू आहे. यावेळी चंद्रकांत खैरे म्हणाले की, कृषिमंत्री केवळ आपल्या मर्जीतला कृषि आयुक्त कसा येईल, याकडे लक्ष देत आहेत. हे सरकार केवळ खोके घेण्यात व्यस्त आहे. मात्र, शेतकऱ्यांना काहीही मदत केली जात नाही. ऐन रब्बी हंगामात त्यांचे वीज कनेक्शन कट केले जात आहे.

जिल्ह्यात ठिकठिकाणी आंदोलन

औरंगाबाद जिल्ह्यात ठिकठिकाणी ठाकरे गटातर्फे आंदोलन सुरू आहे. कन्नड तालुक्यातील पिशोर नाका, रत्नपुर तालुक्यात भक्तनिवास समोर, सिल्लोड तालुक्यात आंबेडकर चौक येथे तर फुलंब्री तालुक्यात टी पॉइंट येथे ठाकरे गटाच्या कार्यकर्त्यांकडून चक्का जाम आंदोलन सुरू आहे.