क्रिकेट स्पर्धा:आझाद चषक टी-20 स्पर्धा; आर्यन वॉरियर्सने फारुक संघाला हरवले, गोलंदाज सय्यद मुबिन ठरला सामनावीर

लकी क्रिकेट क्लबतर्फे आयोजित आझाद चषक टी-20 क्रिकेट स्पर्धेत आर्यन वॉरियर्स संघाने विजय मिळवला. नवल टाटा स्टेडियमवर झालेल्या लढतीत आर्यन वाॅरियर्सने फारुक कुरेशी संघावर 5 गडी राखून मात केली. या लढतीत सय्यद मुबिन सामनावीर पुरस्काराचा मानकरी ठरला.

नाणेफेक जिंकून प्रथम फलंदाजी करताना फारूक संघाचा डाव 17 षटकांत 100 धावांवर संपुष्टात आला. यात सलामीवीर रिझवान कुरेशीने 28 चेंडूंत 5 चौकार खेचत 30 धावा केल्या. दुसरा सलामीवीर तथा कर्णधार फारुक कुरेशी अवघ्या 6 व शेख मोइझ 9 धावांवर परतला. यष्टिरक्षक पांडुरंग गाजेने 23 चेंडूंत 2 चौकारांसह 21 धावा केल्या. विजय पंडुरे व शेख परवेझ भोपळाही फोडू शकला नाही. काझी मुजीबने 14 चेंडूंत 15 धावा केल्या. इतर फलंदाजांनी निराशा केली. त्यामुळे संघ मोठी धावसंख्या उभारु शकला नाही. अर्शद खान अवघ्या 2 धावांवर बाद झाला. आर्यनकडून सय्यद मोबिनने 3 षटकांत 11 धावा देत 3 फलंदाज बाद केले. त्याने एक षटक निर्धावही टाकले. कर्णधार सुफियान अहेमद, सय्यद नुर उल हक व शेख सुमेर यांनी प्रत्येकी दोन दोन गडी टिपले.

अभिजित भगत चमकला

प्रत्युत्तरात आर्यन वॉरियर्सने 14.1 षटकांत 101 धावा करत विजय साकारला. यात सलामीवीर अभिजित भगतने सर्वाधिक 36 धावांची खेळी केली. या खेळीत त्याने 22 चेंडूंत 5 चौकार व 1 षटकार खेचले. दुसरा सलामीवीर अर्शद खान 2 व जीवन मनोहर 2 धावांवर परतले. सय्यद नुर उल हकने 20 चेंडूंत 1 चौकार व 1 षटकार लगावत 18 धावा जोडल्या. कर्णधार सुफियान अहेमदने 19 धावांची विजयी खेळी केली. दिनेश पाटील 17 धावांवर नाबाद राहिला. फारूकच्या राजु पारचक्के, शेख राशिद, अर्शद खान यांनी प्रत्येकी एक-एक गडी बाद केला.