आझाद चषक टी-20 स्पर्धा:इर्शद खान संघाचा विजय, फारुख संघाला हरवले

लकी क्रिकेट क्लबतर्फे आयोजित आझाद चषक टी-20 क्रिकेट स्पर्धेत अर्शद खान संघाने शानदार विजय मिळवला. नवल टाटा स्टेडियमवर शनिवारी झालेल्या लढतीत इर्शद संघाने फारुख कुरेशी संघावर 47 धावांनी मात केली. या लढतीत राम राठोड सामनावीर पुरस्काराचा मानकरी ठरला.

नाणेफेक जिंकून प्रथम फलंदाजी करताना 19.5 षटकांत सर्वबाद 145 धावा उभारल्या. यात सलामवीर राम राठोडने 6 चेंडूंत 3 चौकारांसह 12 धावा केल्या. दुसरा सलामीवीर आर्यन डांगेने 15 चेंडूंत 3 चौकार लगावत 14 धावा जोडल्या. त्यानंतर आलेल्या हर्ष कीर्तिकरने अर्धशतक झळकावले. त्याने 46 चेंडूंचा सामना करताना 7 सणसणीत चौकार व 1 षटकार खेचत सर्वाधिक 58 धावांची खेळी केली. त्याला अर्शद खानने शुभम कांबळेच्या हाती झेल बाद केले. कर्णधार रिझवान 7 धावांवर परतला. जावेद पटेलने 11 चेंडूंत 2 षटकारांसह 14 धावा जोडल्या. दर्शन देशमुख (1) अपयशी ठरला. सय्यद सादिकने 15 चेंडूंत 6 चौकार लगावत 28 धावांचे योगदान दिले. इम्रान पटेल व सिकंदर मेमन शुन्यावर परतले. फारुककडून अर्शद खानने 8 धावा देत 3 फलंदाज तंबूत पाठवले. अझहर बियाबानी व राजू पारचक्के यांनी प्रत्येकी दोन दोन गडी बाद केले. कर्णधार फारुक कुरेशीने एकाला टिपले.

अष्टपैलू राम राठोडची भेदक गोलंदाजी

प्रत्युत्तरात फारूक संघ निर्धारित षटकांत 8 बाद केवळ 98 धावा करु शकला. मधील फळी अपयशी ठरल्याने संघाचा पराभव झाला. अष्टपैलू राम राठोडने भेदक गोलंदाजी करत 16 धावा देत 3 फलंदाजांना पव्हेलियनचा रस्ता दाखवला. कर्णधार फारुख कुरेशीने 23, शुभम कांबळेने 11, अर्शद खानने 28 राजू पारचक्केने 11 धावा केल्या. इतर फलंदाजांनी निराशा केली. योगेश लिंगायतने 2 आणि आर्यन डांगेने एकाला टिपले.