कृषिमंत्री अब्दुल सत्तारांचे तहसीलदारांना आदेश:बँकांकडून शेतकऱ्यांचे अनुदान कर्ज खात्यात जमा करण्याची सक्ती नको

राज्य सरकारने नुकसानग्रस्त शेतकऱ्यांना देण्यात येणारे नुकसान भरपाई अनुदान शेतकऱ्यांच्या कर्ज खात्यात जमा करण्यासाठी राज्यातील कुठल्याही बँकांनी सक्ती करू नये, असे आदेश कृषिमंत्री अब्दुल सत्तार यांनी दिले आहेत. कृषिमंत्री अब्दुल सत्तार यांनी सिल्लोड तसेच सोयगाव तहसीलदार यांनी सर्व राष्ट्रीयीकृत, जिल्हा सहकारी बँक व इतर बँक व्यवस्थापकांची तातडीने बैठक घेऊन याबाबत बँकांना सूचित करावे, अशा सूचनाही सत्तार यांनी तहसीलदारांना दिल्या आहेत. सत्तार मतदारसंघात दौऱ्यावर असताना काही शेतकऱ्यांनी सत्तार यांची भेट घेऊन बँक शेतकऱ्यांना कोणतीही सूचना न देता सदरील अनुदान शेतकऱ्यांच्या कर्ज खात्यात वळती करून कर्जवसुली करत असल्याच्या तक्रारी केल्या. त्यावरून सत्तार यांनी तहसीलदारांना आदेश दिले आहेत.