भारतीय जनता पक्ष:गोपीनाथ मुंडेंच्या गोपीनाथगडावरील जयंती कार्यक्रमाचे शहरात प्रक्षेपण

भारतीय जनता पक्षाच्या वतीने माजी केंद्रीय ग्रामविकासमंत्री दिवंगत गोपीनाथ मुंडे यांची जयंती साजरी करण्यात आली. शहर जिल्हाध्यक्ष शिरीष बोराळकर यांच्या मार्गदर्शनाखाली शहरातील सर्व मंडळांत व वाॅर्डात कार्यक्रम घेण्यात आला. भाजपच्या उस्मानपुरा येथील कार्यालयात गोपीनाथगड, परळी येथील कार्यक्रमाचे थेट प्रक्षेपण करण्यात आले. गोपीनाथगडाचा कार्यक्रम ६०० पेक्षा अधिक ठिकाणी दाखवण्यात आला. बोराळकर यांनी मनोगत व्यक्त केले. प्रदेश उपाध्यक्ष बसवराज मंगरुळे यांनी मुंडे यांच्या आठवणींना उजाळा दिला. भाजप वैद्यकीय आघाडीच्या प्रमुख डॉ. उज्ज्वला दहिफळे यांनी शहरामध्ये विविध ठिकाणी रक्तदान शिबिराचे आयोजन केले होते. अनाथाश्रमात फळे वाटप करून गरजू विद्यार्थ्यांना शालेय साहित्याचे वाटप करण्यात आले. या वेळी भाजप प्रदेश सचिव प्रवीण घुगे, अल्पसंख्याक मोर्चाचे प्रदेश अध्यक्ष हाजी एजाज देशमुख, सरचिटणीस राजेश मेहता, कचरू घोडके, माधुरी आदवंत, किरण पाटील, जालिंदर शेंडगे, दिलीप थोरात, दयाराम बसैये आदी उपस्थित होते.