एकता क्रिकेट चषक:किरण बडादेच्या अष्टपैलू कामगिरीच्या जोरावर साई संघ ठरला चॅम्पियन, केसर सुपर संघ उपविजेता

साई संघाने शानदार कामगिरी करत पहिल्या छावणी एकता क्रिकेट प्रीमियर लीग स्पर्धेचे विजेतेपद पटकावले. केसर सुपर संघाला उपविजेतेपदावर समाधान मानावे लागले. इंदिरा गांधी स्टेडियमवर झालेल्या अंतिम सामन्यात साई संघाने केसरवर 9 गडी राखून मात केली. या लढतीत अष्टपैलू किरण बडादे सामनावीर पुरस्काराचा मानकरी ठरला.

नाणेफेक जिंकून साई संघाने क्षेत्ररक्षणाचा निर्णय घेतला. प्रथम फलंदाजी करताना केसर संघाने 10 षटकांत 3 बाद 92 धावा उभारल्या. यात संघाची सुरूवात खराब झाली. सलामीवीर शुभम क्षिरसागर अवघ्या 2 धावांवर अमित गौरचा शिकार बनला. दुसरा सलामीवीर अजय जाधवने 23 चेंडूंत 5 चौकार खेचत नाबाद 36 धावांची सर्वोच्च खेळी केली. त्याला राजा सुरासेने चांगली साथ दिली. राजाने 25 चेंडूूंचा सामना करताना 3 चौकार व 1 षटकार लगावत 34 धावा काढल्या. संतोष तिलोन 4 धावांवर परतला. साई दळवी 5 धावांवर नाबाद राहिला. साईकडून अमित गौरने एकमेव बळी घेतला. इतर फलंदाज धावबाद झाले.

किरण, राजेशची फटकेबाजी

प्रत्युत्तरात, साई संघाने 5.5 षटकांत 1 गडी गमावत विजयी लक्ष्य गाठले. सलामीवीर किरण बडादेने उपांत्य फेरीतील आपल्या शानदार कामगिरीची पुरावृत्ती करत अंतिम लढतीतही सामनावीर पुरस्कार पटकावला. किरणने 18 चेंडूंचा सामना करताना 5 चौकार व 1 षटकार खेचत सर्वाधिक नाबाद 35 धावांची विजयी खेळी केली. दुसरा सलामीवीर राजेश पवारने तुफान फटकेबाजी करत अवघ्या 9 चेंडूंत 3 चौकार व 2 उत्तुंग षटकार खेचत 24 धावा ठोकल्या. त्याला संतोष तिलोनने शुभम क्षिरसागरच्या हाती झेल बाद करत अडथळा दूर केला. कर्णधार अमित गौरने देखील फटकेबाजी केली. त्याने 8 चेंडूंत 3 षटकार मारत नाबाद 21 धावांचे योगदान दिले. संघाने अवघ्या 35 चेंडूंत विजय मिळवला. संघाला 13 धावा अतिरिक्त मिळाल्या. साईच्या किरण परभणेने 5 चेंडूंत सर्वाधिक 20 धावा दिल्या.

थाटात बक्षीस वितरण

विजेत्या संघाला 21 हजार व चषक आणि उपविजेत्या संघाला 15 हजार व चषक मान्यवरांच्या हस्ते प्रदान करण्यात आला. त्याचबरोबर विविध वैयक्तीक पारितोषिके ठेवण्यात आली होती. बक्षीस वितरण प्रसंगी बाळासाहेब गायकवाड, अशोक सायन्ना यादव, अश्फाक खान, उमर खान, संजय सोनवणे, रख्माजी जाधव, प्रशांत तारगे, आयोजक सदानंद धांडे, सुरेश वर्मा, विजय पाटील, मयंक पांडे, अजहर शेख आदींची प्रमुख उपस्थिती होती.