विद्यापीठातील नव्या इन- आऊट गेटचे बांधकाम पाडले:आंबेडकरी चळवळीतून झालेल्या विरोधामुळे प्रशासनाचा निर्णय

डाॅ. बाबासाहेब आंबेडकर मराठवाडा विद्यापीठाच्या मुख्य प्रवेशद्वाराच्या सुशोभिकरणासोबत नवे इन आउट गेट उभारण्यात येत होते. त्याला प्रतिगेट म्हणून आंबेडकरी चळवळीतून झालेला विरोध आणि वादविवादानंतर या इन - आऊट गेटचे बांधकाम रविवारी पाडण्यात आले.

विद्यापीठाच्या प्रवेशद्वाराला ऐतिहासिक संदर्भ आहेत. तसेच या प्रवेशद्वाराशी आंबेडकरी जनतेच्या भावना जोडल्या गेल्या आहेत. या प्रवेशद्वाराचे संवर्धन आणि सुशोभिकरणाचे काम विद्यापीठाने हाती घेतले होते. गेटच्या संवर्धन आणि सुशोभीकरणाच्या कामा वेगाने सुरू होते.

सुरक्षा भिंती, बाजूच्या दोन्ही रस्त्यांची कामे पूर्ण झाली असून, सुरक्षा गेट आणि सुशोभीकरणाचे काम विद्यापीठ नामविस्तार दिनापर्यंत पूर्ण होणे अपेक्षित आहे. दिल्ली येथील इंडिया गेटच्या धर्तीवर विद्यापीठातील या गेटचे सुशोभिकरणाच्या या प्रकल्पासाठी सुमारे 2 कोटींचा खर्च केला जात आहे. सुशोभिकरणासोबत प्रवेशद्वाराच्या मधुन एवजी आता दोन्ही बाजूने ये-जा करावी लागणार आहे. त्यासाठी रस्ता तयार करण्यात आला आहे.

विद्यापीठात येणाऱ्या-जाणाऱ्यांवर नियंत्रण ठेवण्यासाठी इन-आउट गेटची उभारणी सुरू आहे. त्या गेटच्या दोन्ही बाजून पाण्याचे कारंजे प्रस्तावित आहे. इन आऊट गेटच्या 3 टाॅवरची उभारणी पुर्ण होत आलेली असतांना हे प्रतिगेट होत असल्याचे म्हणत आंबेडकरी संघटनांकडून त्याला विरोध दर्शविण्यात आला.

विरोध वाढल्याने कुलगुरू डॉ. प्रमोद येवले यांनी हे बांधकाम काढून घेण्याचा निर्णय घेतला. त्यानुसार कुलसचिव डॉ. भगवान साखळे यांनी जागतिक बँक प्रकल्प कार्यकारी अभियंत्यांना पत्र लिहून इन आउट गेट चे बांधकाम तातडीने काढून घेण्याचे पत्र दिले. त्यानुसार रविवारी हे बांधकाम पाडण्यात आले.