दंडात्मक कारवाई:थुंकताना पकडला गेला अन् आढळले छर्ऱ्याचे पिस्टल

तरुणाच्या एका घोळक्याला गुटखा खाऊन थुंकणे चांगलेच महागात पडले. पोलिसांनी पकडून दंडात्मक कारवाई करताना त्याच्याकडे छर्ऱ्याचे पिस्टल आढळले. पोलिसांनी थुंकण्यासह शस्त्र अधिनियमांतर्गत गुन्हा दाखल करून पिस्टल व दुचाकी जप्त केली. जवाहरनगर पोलिस ठाण्याचे अंमलदार चंद्रकांत पोटे सहकाऱ्यांसह गस्तीवर होते. त्यांना सेव्हन हिल्स उड्डाणपूल परिसरात एक तरुण गुटख्या खाऊन थुंकताना आढळला. त्यांनी तत्काळ त्याला व त्याच्या मित्राला पकडले. त्यांची नावे रवी आसाराम दुबे (२८), आकाश प्रकाश अहिरे (२२, रा. दोघेही पाचोड) असल्याचे सांगितले. पोलिसांनी त्याची झडती घेतली. मात्र, गुटख्याच्या जागी थेट पिस्टल आढळले.