कौतुकास्पद:राष्ट्रीय कुस्ती चाचणी स्पर्धेत महाराष्ट्राचे वर्चस्व; 1 महिला, 4 पुरुष मल्लांची आंतरराष्ट्रीय स्पर्धेसाठी निवड

भारतीय कुस्ती महासंघातर्फे लखनऊ व सोनिपत हरियाणा येथे झालेल्या अनुक्रमे 15 वर्षाखालील आणि 20 वर्षाखालील राष्ट्रीय कुस्ती संघ निवड चाचणी स्पर्धेत उत्कृष्ट कामगिरी करत महाराष्ट्राच्या युवकांनी वर्चस्व राखले आहे. यामध्ये 1 महिला, 4 पुरुष मल्लांची आंतरराष्ट्रीय स्पर्धेसाठी निवड झाली आहे.

महाराष्ट्राच्या श्रावणी लवटे, प्रणय चौधरी, तुषार पाटील, तनिष्क कदम, महेंद्र गायकवाड या 5 कुस्तीपटूंची मनामा (बहरिन) येथे 2 ते 10 जुलैदरम्यान होणाऱ्या आशियाई आंतरराष्ट्रीय चॅम्पियनशिप स्पर्धेसाठी भारतीय संघात निवड झाली आहे. देशाला कुस्तीमध्ये पहिले ऑलिम्पिक पदक जिंकून देणारे खाशाबा जाधव यांच्यापासून आजपर्यंत महाराष्ट्राला कुस्तीची मोठी परंपरा लाभलेली आहे, लालामातीतून मॅटवर आलेले युवा मल्ल आता ती परंपरा पुढे चालवत आहे.

निवड झालेले खेळाडू :

भविष्यातील महाराष्ट्र केसरीचा दावेदार सोलापूरचा महेंद्र गायकवाड :

बहरिन येथील स्पर्धेसाठी सोलापूरच्या 20 वर्षीय युवा मल्ल महेंद्र गायकवाडची निवड झाली आहे. तो 125 किलाे वजन गटात भारताचे प्रतिनिधीत्व करेल. वजनदार असला तरी अतिशय चपळ व वेगवान खेळी ही त्याची वैशिष्ट आहे. त्याच्याकडे भविष्यातील महाराष्ट्र केसरी गदेचा दावेदार म्हणून देखील पाहिल्या जाते. तो सध्या आंतरराष्ट्रीय कुस्ती संकुल पुणे येथे नियमित सराव करतो. तो अर्जुन पुरस्कार प्राप्त काका पवार यांचा पट्ट्या आहे. सर्वसाधारण कुटुंबातील हा पहिलवान आहे.