प्रात्यक्षिकांचे सादरीकरण:हळदीपासून बनवा पिवळा,‎ तर पालकापासून हिरवा रंग‎

बाजारातील‎ रासायनिक रंगामुळे त्वचेला हानी पोहोचू‎ शकते. त्यामुळे नैसर्गिक रंगाने होळीचा‎ आनंद घ्या. घरात वापरणाऱ्या वस्तूंपासून‎ नैसर्गिक रंग तयार करा, असे सांगून सुलभा‎ जोशी यांनी नैसर्गिक रंग बनवण्याच्या‎ प्रात्यक्षिकांचे सादरीकरण केले.‎ सिडको एन-७ येथील गरवारे कम्युनिटी‎ सेंटरच्या वतीने शनिवारी धूलिवंदन‎ सणानिमित्त नैसर्गिक रंग बनवण्याची‎ कार्यशाळा झाली. गरवारे कम्युनिटी सेंटरचे‎ संचालक सुनील सुतवणे, रमाकांत रौतल्ले,‎ शिल्पा अस्वलीकर उपस्थित होते.‎ होळीसाठी विविध रंग बाजारात येतात. परंतु‎ घरातील भाजीपाला, इतर साहित्यापासून‎ नैसर्गिक रंग बनवता येतात, असे जोशी यांनी‎ प्रात्यक्षिकातून सांगितले.‎

नैसर्गिक ओला रंग बनवण्याची पध्दत‎ : पालक किंवा पुदिना पाण्यात‎ उकडल्यानंतर ते कुस्करून घेतल्यास हिरवा‎ रंग तयार होतो. उकडलेले पालेभाज्यातील‎ पाणी थंड झाल्यानंतर त्यात सोडा टाकला‎ तर हिरवा रंग होतो. बीटचे बारीक-बारीक‎ तुकडे करून ते शिजवून घ्यायचे. त्यानंतर ते‎ पाणी गाळून घेतले तर जांभळा रंग तयार‎ होतो. त्यात सोडा टाकला तर जास्त काळ‎ रंग राहतो. हळदीपासून पिवळा रंग तयार‎ होतो. बाजारात मिळणाऱ्या मंजिष्ठा आणून‎ त्या जर उकळून घेतल्यास त्यापासूनही‎ केशरी रंग तयार होतो.‎

कोरडा रंग बनवण्याची पध्दत‎
ओल्या रंगासोबतच कोरडा रंगसुद्धा घरातील वस्तू‎ वापरून करता येते. हळदीमध्ये बुक्का मिश्रित‎ केल्यास हिरवा रंग तयार होतो. हळदीमध्ये सोड्याचे‎ पाणी किंवा चुना टाकला तर लाल रंग तयार होतो.‎ पळसाच्या फुलांच्या वापरातून केशरी आणि रात्री‎ पाण्यात भिजवून ठेवली तर ओला केशरी रंग तयार‎ होतो. चंदनाच्या पावडरपासून पिवळा रंग होतो.‎ जास्वंदाच्या फुलांच्या पावडरमध्ये अर्धा कप हळद,‎ चिमूटभर चुना टाकला तर लाल रंगाची निर्मिती होते.‎ अशा प्रकारे झेंडूची फुले, पारिजातकाच्या‎ फुलांपासूनही रंग तयार करता येतात, असे त्यांनी‎ सांगितले.‎