क्रीडा:एमसीए महिला क्रिकेट, छत्रपती संभाजीनगरकडून बीड संघाचा धुव्वा, पुजा जमधडे सामनावीर

महाराष्ट्र क्रिकेट संघटनेतर्फे आयोजित १९ वर्षाखालील महिला निमंत्रितांच्या वनडे क्रिकेट स्पर्धेत यजमान छत्रपती संभाजीनगर संघाने मोठा विजय मिळवला. एमजीएम स्पोर्ट््स क्लबवर शनिवारी झालेल्या सामन्यात यजमान संघाने बीड संघावर ८२ धावांनी मात केली. या लढतीत पुजा जमधडे सामनावीर ठरली.

नाणेफेक जिंकून प्रथम फलंदाजी करताना छत्रपती संभाजीनगरने ४१.३ षटकांत सर्वबाद १७६ धावा उभारल्या. यात सलामीवीर जिया सिंगने ३८ चेंडूंत ८ चौकार खेचत सर्वाधिक ४० धावांची खेळी केली. दुसरी सलामीवीर प्रिया राजपूतने १४ धावा काढल्या. हंसिका शर्माने ५७ चेंडूंत २ चौकारांसह २१ धावा केल्या. रुपाली जाधव (४), यशोदा घोगरे (१), काव्या गुळवे (१३) हे मोठी खेळी करु शकले नाहीत. अष्टपैलू पुजा जमधडेने ४४ चेंडूंत २१ धावा जोडल्या. कर्णधार भुमिका चव्हाणने २८ चेंडूंत ३ चौकारांसह २८ धावांचे योगदान दिले. बीडकडून अनुश्रीने ३७ धावा देत ४ गडी बाद केले. कल्याणी खंडागळेने ३, आदिती जोशीने २ आणि आदिती मेहताने १ गडी टिपला.

जमधडेने अष्टपैलू कामगिरी

प्रत्युत्तरात बीड संघाचा डाव ३१.५ षटकांत अवघ्या ९४ धावांवर संपुष्टात आला. यात अनुश्रीने सर्वाधिक ३८ धावा काढल्या. या खेळी तिने ५१ चेंडूंत ६ चौकार खेचले. फलंदाजीत उत्कृष्ट कामगिरी करणाऱ्या छत्रपती संभाजीनगरच्या पुजा जमधडेने गोलंदाजीतही कमाल कामगिरी केली. पुजाने १८ धावा देत २ फलंदाजांना तंबूचा रस्ता दाखवला. अनुश्री गलांडेने १८ आणि कर्णधार साक्षी शिंदेने १२ धावा केल्या. इतर फलंदाजांना दुहेरी धावसंख्याही गाठता आली नाही. यशोदा घोगरेने २ आणि प्रिया राजपूतने ३ गडी बाद केले.