10 फेब्रुवारीपर्यंत मुदतवाढ:आरटीईसाठी 617 पैकी फक्त 281 शाळांची नोंदणी, 336 शाळा बाकी

आर्थिक दुर्बल घटकातील पालकांच्या पाल्यास शिक्षणाचा अधिकार मिळावा यासाठी आरटीई प्रवेशाची प्रक्रिया सुरू करण्यात आली आहे. यात प्रथम शाळांना आरटीई नोंदणी करण्यासाठी मुदत देण्यात आली आहे. ही मुदत शुक्रवारी पूर्ण झाली. या मुदतीत ६१७ शाळांपैकी फक्त २८१ शाळांनी नोंदणी करून माहिती कळवली आहे. अद्यापही ३३६ शाळांची नोंदणी बाकी असल्याचे समोर आले आहे. शाळांनी नोंदणी न केल्यास त्यांच्यावर शिस्तभंगाची कारवाई करून मान्यता रद्द करण्यात येऊ शकते, असा इशारा शिक्षण विभागाने दिला आहे. दरम्यान, १०० टक्के नोंदणी होण्यासाठी १० फेब्रुवारीपर्यंत मुदतवाढ देण्यात आली आहे.

बालकांचा मोफत व सक्तीच्या शिक्षणाचा अधिकार अधिनियम २००९ नुसार खासगी शाळांमध्ये २५ टक्के जागांवर प्रवेश दिला जातो. त्यानुसार वर्ष २०२२-२०२३ शैक्षणिक वर्षासाठी आरटीई २५ टक्के प्रवेशाची ऑनलाइन सोडत काढून मराठवाड्यात १५ हजार ५६५ विद्यार्थ्यांची निवड यादी आरटीई पोर्टलवर जाहीर केली होती. या एकूण जागांपैकी ४० टक्के जागा रिक्त राहिल्या आहेत. दरम्यान, या वर्षी प्रक्रिया राबवून शंभर टक्के प्रवेश करण्यासाठी प्रक्रिया सुरू केली आहे. मात्र हवा तसा प्रतिसाद अजूनही शाळांकडून मिळत नसल्याचे चित्र शिक्षण विभागाने दिलेल्या आकडेवारीवरून दिसत आहे. शाळांना नोंदणीसाठी २३ जानेवारी ते २ फेब्रुवारीपर्यंत मुदत देण्यात आली होती.

पालकांना वेळापत्रकाची प्रतीक्षा शाळांची नोंदणी प्रक्रिया सुरू असल्याने आता पालकांना त्यांच्या पाल्यांसाठीची नोंदणी प्रक्रिया कधी सुरू होणार याची प्रतीक्षा आहे. गेल्या वर्षी फेब्रुवारीपर्यंत पालकांसाठीची नोंदणी सुरू झाली होती. त्यामुळे यंदा नोंदणी कधी होणार याकडे सर्वांचे लक्ष लागले आहे.

नोंदणी न केल्यास शिस्तभंगाची कारवाई करू आरटीई प्रवेशासाठी शाळांनी नोंदणी करणे आवश्यक आहे. त्यांच्याकडे असलेल्या आरटीई प्रवेशासाठीच्या पहिल्या वर्गातील जागा, वर्गाप्रमाणे क्षमता शिक्षण विभागाला कळवायची असून प्रमाणपत्रही घ्यायचे आहे. असे न केल्यास शिस्तभंगाची कारवाई करून मान्यता रद्द करण्यात येईल. ज्या शाळा बंद आहेत, ज्यांना मायनॉरिटीचा दर्जा आहे त्यांचीही माहिती घेत आहोत. - जयश्री चव्हाण, प्राथमिक शिक्षणाधिकारी