खेळाच्या प्रचार-प्रसारासाठी प्रयत्न:टेनिस-व्हॉलिबॉल खेळाच्या विकासासाठी शरद पवार, रावसाहेब दानवे यांच्याशी चर्चा

आंतरराष्ट्रीय टेनिस व्हॉलिबॉल फेडरेशनचे अध्यक्ष डॉ. व्यंकटेश वांगवाड व महाराष्ट्र राज्य सचिव गणेश माळवे यांनी नवी दिल्ली येथे राष्ट्रवादी काँग्रेसचे अध्यक्ष शरद पवार आणि केंद्रीय मंत्री रावसाहेब दानवे यांची भेट घेऊन टेनिस व्हॉलिबॉल खेळाच्या विकासासाठी मदत करण्याचे विनंती केली.

टेनिस व्हॉलिबॉल फेडरेशन ऑफ इंडियाच्या वतीने नवी दिल्ली येथील जनपथ परिसरातील खासदार शरद पवार व केंद्रीय राज्यमंत्री रावसाहेब दानवे यांची भेट घेऊन त्यांना संबंधित खेळाची माहिती देऊन या खेळाच्या प्रसारासाठी मदत करण्याचे साकडे घातले.

दिल्ली सचिव हरेंद्र कुमार, हरियाणा सचिव परवेज राणा, सुरेंद्र शास्त्री, निकिता डागर आदींची देखील भेट घेऊन त्यांना टेनिस व्हॉलिबॉल खेळाची सविस्तर माहिती दिली.

भारतीय ऑलिम्पिक महासंघाला प्रस्ताव

डॉ. वांगवाड यांनी महाराष्ट्राच्या मातीतील खेळ जगाच्या पाठीवर घेऊन जाण्यासाठी, खेळाच्या भविष्यातील योजना सांगितल्या. त्यासंबंधी विविध पर्याय, उपाय, स्पर्धा, निधी आदीची माहिती दिली. दोन्ही नेत्यांनी याबाबत सकारात्मकता दाखवली. भारतीय ऑलिम्पिक महासंघाला प्रस्ताव सादर करण्यात आला आहे.

भागवत कराड यांच्या निवासस्थानी भेट

केंद्रीय क्रीडा मंत्रालयात अंतिम मान्यतेसाठी वरिष्ठ अधिकाऱ्यांची भेट घेतली. केंद्रीय राज्य अर्थमंत्री डॉ. भागवत कराड यांच्या निवासस्थानी भेट देऊन टेनिस व्हॉलिबॉल खेळाची माहिती पुस्तिका देण्यात आली. या भेटीसाठी खासदार संजय जाधव, खा.वंदना चव्हाण, माजी आमदार हरीभाऊ लहाने, भास्करराव दानवे, विजय कान्हेकर, शिंपले राजेंद्र, गजानन वाळके, चंद्रकांत बोराडे यांचे सहकार्य लाभले.

आशियाई स्पर्धा आयोजित करणार

टेनिसव्हॉलिबॉल खेळाच्या आजपर्यंत 24 राष्ट्रीय क्रीडा स्पर्धा आयोजित करण्यात आल्या आहेत. तसेच विदेशात श्रीलंका, भुतान, नेपाळ, बांगलादेश, पाकिस्तान, थायलंड, इराण, अफगाणिस्तान, जपान, मलेशिया या देशात या खेळाचा प्रसार व प्रचार करण्यात आला आहे. तसेच १६ जुलै जागतिक टेनिस व्हॉलीबॉल दिनाचे औचित्य साधून साऊथ आशियाई क्रीडा स्पर्धा आयोजन बाबत आंतरराष्ट्रीय फेडरेशन अध्यक्ष डॉ. व्यंकटेश वांगवाड यांनी माहिती दिली.

क्रीडा मंत्रालयाशी चर्चा करणार

टेनिस व्हॉलीबॉल हा आपल्या महाराष्ट्राच्या मातीतील खेळ आहे. त्यांच्या विकासासाठी मी कटिबद्ध असून ऑलिम्पिक संघटना व क्रीडा मंत्रालयाशी चर्चा करेल, असे आश्वासन खासदार शरद पवार यांनी दिले.