आरटीई कोट्यातील प्रवेश प्रक्रियेला सुरुवात:आरटीईच्या प्रक्रियेत यंदा 88 टक्क्यांवर शाळांची नोंद; मुदतवाढीने विलंब शक्य

वर्ष २०२३-२४ साठी आरटीई कोट्यातील प्रवेश प्रक्रियेला सुरुवात झाली आहे. पहिल्या टप्प्यात २३ जानेवारी ते ३ फेब्रुवारीदरम्यान शाळांची नोंदणी हाती घेण्यात आली. यादरम्यान राज्यातील ८ हजार १७१ शाळांत ८५ हजार ९६६ विद्यार्थ्यांचा कोटा मिळाला. शाळांना कारवाईचा धाक दाखवल्याने यंदा राज्यात ९ हजार २३० शाळांपैकी ८ हजार १७१ शाळांची नोंदणी झाली. १ हजार ५९ शाळांनी वेळेत नोंदणीकडे पाठ फिरवली. नोंदणी शंभर टक्के करण्याच्या दृष्टीने या प्रक्रियेला १० फेब्रुवारीपर्यंत आणखी मुदतवाढ दिली आहे. त्यामुळे यंदाही आरटीई प्रवेश प्रक्रिया लांबणीवर पडण्याची शक्यता आहे.

बालकांचा मोफत व सक्तीच्या शिक्षणाचा अधिकार अधिनियम २००९ नुसार, दरवर्षीप्रमाणे २५ टक्के प्रवेश प्रक्रिया ऑनलाइन पद्धतीने राबवण्यात येतेे. २०२२-२३ मध्ये ऑनलाइन सोडत काढून राज्यात ९० हजार ६८८ तर मराठवाड्यात १५, ५६५ विद्यार्थ्यांची निवड यादी आरटीई पोर्टलवर जाहीर केली होती. गतवर्षी ही प्रक्रिया मुदतवाढीवरच चालवण्यात आली. यामुळे ९,०८६ शाळांतील राज्यात ४० टक्के विद्यार्थ्यांच्या जागा रिक्त राहिल्या. हा गंभीर प्रकार लक्षात घेता या वर्षी यंत्रणेने थेट कार्यवाही करण्याचा धाक दाखवल्याने यंदा पहिल्याच टप्प्यात ८८ टक्के शाळांनी नोंदणी केली. डेडलाइनच्या अखेरच्या दिवशी ८,१७१ शाळांनीच नोंदणी केली. या वर्षीपासून नव्या नियमांनुसार प्रक्रिया राबवली जात असल्याचे सांगण्यात आले.