‘मुकुल बालक’मध्ये ‘विज्ञाननगरीतून फेरफटका’ उपक्रम:विद्यार्थी, पालकांनी अनुभवल्या वैज्ञानिक गमतीजमती

छोटी वस्तू भिंगातून मोठी कशी दिसते? खोडरबर न वापरता चित्र कसे गायब होते? हे पाहून बच्चे कंपनी आश्चर्यचकित झाली. निमित्त होते सिडकोतील मुकुल बालक मंदिरमध्ये बालवाडीतील मुलांसाठी आयोजित ‘विज्ञाननगरीतून फेरफटका’ या उपक्रमाचे.मुकुल बालक मंदिर शाळेत विज्ञाननगरीत बालवाडीत घेण्यात येणारे २५ ते ३० वैज्ञानिक प्रयोग मांडण्यात आले होते. बालवयातील मुलांना या प्रयोगांमागील वैज्ञानिक संकल्पनांची माहिती व्हावी, हा या उपक्रमामागील हेतू होता. विज्ञानातील विविध गमतीजमतींचा अनुभव घेऊन मुलांमधील जिज्ञासू वृत्ती वाढीस लागावी, विविध प्रयोगांबाबत कुतूहल निर्माण होऊन हे असे का? तसे का? अशा प्रश्नांचा शोध घेण्याची वृत्ती निर्माण व्हावी. भविष्यात विद्यार्थ्यांमधून संशोधक, वैज्ञानिक निर्माण व्हावेत, यासाठी ‘विज्ञाननगरीतून फेरफटका’चे आयोजन केल्याचे शिक्षकांनी सांगितले.

या उपक्रमास विद्यार्थ्यांसह पालकांनीदेखील उत्स्फूर्त प्रतिसाद दिला. पालकांनी विज्ञाननगरीतील प्रयोगांचा अनुभव घेतला. घरी सहज उपलब्ध असणाऱ्या छोट्या-छोट्या साहित्यातून, पदार्थातून आणि हवा, पाणी यांचा वापर करून आपण मुलांना विविध शास्त्रीय प्रयोग करून दाखवू शकतो हे पालकांना समजले. विज्ञाननगरीची सुरुवात बाल वैज्ञानिकांच्या हस्ते पाण्यात दीप प्रज्वलन करून केली. काही बालके छोटी वस्तू भिंगातून कशी मोठी दिसते हे बघण्यात गुंग होते.

काही जण डांबर गोळीचा नाच बघत होते. काढलेले चित्र हाताने किंवा खोडरबर न वापरता कसे गायब होते, हे पाहून अचंबित होत होते. ग्लास ठेवल्यावर नाणे कसे गायब होते हे बघून आश्चर्यचकित होत होते. एका मेणबत्तीच्या अनेक प्रतिमा आरशात पाहून छोटे मित्र हरखून गेले. प्राथमिक विभागाचे मुख्याध्यापक सुरेश परदेशी यांच्या मार्गदर्शनाखाली शिक्षकांच्या सहकार्याने हा उपक्रम राबवण्यात आला.