टी-20 क्रिकेट:कंम्बाइन इंडस्ट्रिज शेंद्रा संघाचा शानदार विजय, जॉन्सनला हरवले

मसिआतर्फे आयोजित टी-20 औद्योगिक क्रिकेट स्पर्धेत कंम्बाइन इंडस्ट्रिज शेंद्रा संघाने शानदार विजय मिळवला. शनिवारी गरवारे स्टेडियमवर झालेल्या सामन्यात शेंद्राने जाॅन्सन संघावर 12 धावांनी मात केली. या लढतीत संदीप तुपे सामनावीर ठरला.

नाणेफेक जिंकून प्रथम फलंदाजी करताना शेंद्राने 20 षटकांत 6 बाद 144 धावा उभारल्या. यात सलामीवीर संदीप तुपेने शानदार अर्धशतक झळकावले. त्याने 48 चेंडूंत 3 चौकार व 1 षटकार खेचत सर्वाधिक 50 धावा काढल्या. कर्णधार संदीप खोसरेने 17 धावा काढल्या. विपूल भोंडे भोपळाही फोडू शकला नाही. ओंकार ठाकूरने 15 धावा जोडल्या. पवन कावळे (9)व प्रविण नागरे (6) मोठी खेळी करु शकले नाहीत. संदीप राठोडने नाबाद 12 धावा केल्या. तळातील फलंदाज शिवम शिंदेने 11 चेंडूंत 3 चौकार खेचत नाबाद 22 धावांचे योगदान दिले. जाॅन्सनकडून अमर यादवने 17 धावा देत 3 गडी बाद केले. दिपक खानवीलकर व अर्थव पुजारीने प्रत्येकी एकाला टिपले.

राघव नाईकचे अर्धशतक व्यर्थ

प्रत्युत्तरात जॉन्सन संघ निर्धारित षटकांत 2 बाद 132 धावा करू शकला. यात सलामीवीर राघव नाईकने अर्धशतक झळकावले, मात्र संघाच्या पराभवामुळे त्याचे अर्धशतक व्यर्थ ठरले. राघवने 52 चेंडूंत 7 चौकारांच्या मदतीने 64 धावांची खेळी केली. त्यानंतर तो रिटायर्ड हर्ट झाला. अर्थव पुजारीने 15, अमर यादवने 19 धावा केल्या. कर्णधार प्रविण क्षीरसागर 8 धावांवर नाबाद राहिला. संघाला 17 धावा अतिरिक्त मिळाल्या. शेंद्राकडून शिवम शिंदे व संदीप खोसरेने प्रत्येकी एक गडी बाद केला.