विद्यापीठाच्या समितीने केली चौकशी‎:कोळवाडीतील जिवरख‎ कॉलेजची झाडाझडती‎

कन्नड तालुक्यातील कोळवाडी‎ येथील गोविंदराव पाटील जिवरख‎ वरिष्ठ महाविद्यालयाची संलग्नता‎ काढण्याची प्रक्रिया सुरू करण्यात‎ आली आहे. ‘कॉलेजची फक्त‎ पाटी, प्रत्यक्षात परीक्षा केंद्र २४ किमी‎ दूरच्या शाळेत’ हे वृत्त ‘दिव्य‎ मराठी’ने रविवारच्या अंकात प्रसिद्ध‎ केलेे होते. कुलगुरू डॉ. प्रमोद येवले‎ यांनी तातडीने परीक्षा केंद्र रद्द करून‎ तीनसदस्यीय समितीमार्फत येथील‎ चौकशी सुरू केली होती. या‎ समितीने सोमवारी येथे भेट दिली‎ असता गावात फक्त एकच पाटी‎ असल्याचे त्यांच्या निदर्शनास आले.‎ ही समिती बुधवारी त्यांचा अहवाल‎ सादर करणार आहे. त्यानंतर‎ कॉलेजवर कडक कारवाई होण्याची‎ शक्यता आहे.‎

या महाविद्यालयातील सदर‎ गलथान कारभार दिव्य मराठीच्या‎ प्रतिनिधीने प्रकाशात आणला होता.‎ त्यावर कॉलेजच्या पायाभूत‎ सुविधांच्या तपासणीसाठी‎ कुलगुरूंनी विज्ञान व तंत्रज्ञान‎ विद्याशाखेचे अधिष्ठाता डॉ.‎ भालचंद्र वायकर यांच्या अध्यक्षतेत‎ तीनसदस्यीय चौकशी समिती गठित‎ केली आहे. या समितीत मानव्य व‎ समाजिकशास्त्रे विद्याशाखेचे‎ अधिष्ठाता डॉ. प्रशांत अमृतकर‎ आणि डॉ. दीपक पाचपट्टे यांचाही‎ समावेश आहे. समितीने सोमवारी‎ दुपारी ३.३० वाजता कोळ‌वाडीच्या‎ जिवरख कॉलेजची झाडाझडती‎ घेतली. कॉलेजला फक्त पाटी‎ लावलेली होती.

आतमध्ये‎ प्रयोगशाळा, ग्रंथालय, खेळाचे‎ मैदान, वर्गखोल्या, प्राचार्यांच्या‎ केबिनसह इतर कुठल्याही पायाभूत‎ सुविधांची वानवा असल्याचे‎ समितीने पाहिले. समिती कॉलेजला‎ पोहोचली त्या वेळी प्राचार्य विकास‎ जिवरख छत्रपती संभाजीनगर‎ शहरात होते. समितीचे सदस्य‎ बुधवारी कुलगुरूंना अहवाल सादर‎ करणार आहेत. कुलगुरू कॉलेजला‎ त्यांची बाजू मांडण्याची संधी देतील.‎ त्यानंतर कॉलेजची संलग्नता रद्द‎ होण्याची शक्यता आहे.‎