व्हेराॅक शालेय क्रिकेट स्पर्धा:केंम्ब्रिज स्कूलची सरस्वती भुवन प्रशालेवर मात, व्योम खर्चे ठरला सामनावीर

औरंगाबाद जिल्हा क्रिकेट संघटनेच्या मैदानावर सुरू असलेल्या व्हेरॉक आंतरशालेय क्रिकेट स्पर्धेत केंम्ब्रिज स्कूलने विजय मिळवला. केंम्ब्रिजने सरस्वती भुवन प्रशालेच्या (एसबी) संघावर 41 धावांनी मात केली. एसबीच्या गोलंदाजांनी व फलंदाजांनी सुमार कामगिरी केल्याने त्यांना पराभवाचा सामना करावा लागला. या लढतीत व्योम खर्चे सामनावीर पुरस्काराचा मानकरी ठरला.

नाणेफेक जिंकून एसबीने क्षेत्ररक्षणाचा निर्णय घेतला. प्रथम फलंदाजी करताना केंम्ब्रिजने 15 षटकांत 8 बाद 124 अशी आव्हानात्मक धावसंख्या उभारली. यात सलामीवीर तथा कर्णधार जीत राजपूतने संघाला चांगली सुरुवात करुन दिली. त्याने 27 चेंडूंचा सामना करताना 5 चौकार खेचत सर्वाधिक 32 धावांची खेळी केली. गणेश सरताळेने स्वत:च्या गोलंदाजीवर त्याचा झेल घेत तंबूत पाठवले. दुसरा सलामीवीर हर्ष धुतने 5 चेंडूंत 2 चौकार व 1 षटकार लगावत 14 धावा केल्या. ए. जैस्वालने 11 धावा जोडल्या. व्योम खर्चे (6) व अर्थव तोतला (2) हे मोठी खेळी करण्यात अपयशी ठरले. याद्य्निक पुजारीने 6 चेंडूंत 1 चौकार व 1 षटकार खेचत 12 धावा काढल्या. ध्रुव ढेकाणे भोपळाही फोडू शकला नाही. अमेय गर्गे ७ धावांवर नाबाद राहिला. संघाला तब्बल 35 धावा अतिरिक्त मिळाल्या आहेत. एसबीकडून समर्थ देशमुखने 23 धावा देत सर्वाधिक 3 गडी बाद केले. युवराज पटेल, श्रेयस जोशी व गणेश सरताळेने प्रत्येकी एकाला टिपले.

व्योम, अवुधतची भेदक गोलंदाजी :

प्रत्युत्तरात, सरस्वती भुवनचा संघ निर्धारित षटकांत 9 बाद अवघ्या 83 धावा करु शकला. केंम्ब्रिजच्या भेदक गोलंदाजी पुढे एसबीचे फलंदाज टिकू शकले नाहीत. संघाची सुरुवात खराब झाली. सलामीवीर कृष्णा पाटील अवघ्या 4 धावांवर परतला. स्वराज कुलकर्णीने 10 आणि कर्णधार श्रेयस जोशीने 12 धावा केल्या. त्यानंतर युवराज पटेल व ऋषिकेश पाटील शुन्यावर बाद झाले. गणेश सरताळेने 15 चेंडूंत 2 चौकारांसह 18 आणि समर्थ देशमुखने 28 चेंडूंत 3 चौकारांच्या मदतीने सर्वाधिक नाबाद 19 धावा केल्या. इतर फलंदाजांनी निराशा केली. केंम्ब्रिजच्या व्योम खर्चेने 22 धावा देत 3 गडी बाद केले. अवधुत पालोदकरने 10 धावांत 2 बळी घेतले. अर्थव तोतला, ध्रुव ढेकणे व ए. जैस्वालने प्रत्येकी एक गडी टिपला.