माजी खासदार चंद्रकांत खैरे यांचा आरोप:लोकसभा निवडणुकीत माझ्या पराभवाला रावसाहेब दानवे जबाबदार

लोकसभा निवडणुकीत माझ्या पराभवाला भाजपचे तत्कालीन प्रदेशाध्यक्ष रावसाहेब दानवे तर हंसराज अहीर यांच्या पराभवाला वनमंत्री सुधीर मुनगंटीवार जबाबदार आहेत, असा आरोप शिवसेना (उद्धव बाळासाहेब ठाकरे) पक्षाचे नेते व माजी खासदार चंद्रकांत खैरे यांनी चंद्रपूर येथे केला.

शिवगर्जना यात्रेनिमित्ताने चंद्रकांत खैरे चंद्रपूर जिल्ह्याच्या दौर्‍यावर आले आहेत. स्थानिक विश्रामगृहात त्यांनी पत्रकारांशी संवाद साधला. तत्पूर्वी राष्ट्रीय मागासवर्गीय आयोगाचे अध्यक्ष हंसराज अहीर यांच्याशी त्यांची भेट झाली. अहीरांचा पराभव मुनगंटीवार यांच्यामुळे झाला. याचा ठोस पुरावा नाही. मात्र ही कार्यकर्त्यांची भावना आहे, असे खैरे म्हणाले.

आम्हाला हिंदूत्व शिकवू नये

यावेळी चंद्रकांत खैरे म्हणाले, राज्यात भाजपने पैशाच्या बळावर फोडाफोडीचे राजकारण सुरू केले. याचे गंभीर परिणाम भविष्यात भाजपला भोगावे लागतील. शिवसेनाप्रमुख बाळासाहेब ठाकरे यांच्या नेतृत्वात शिवसेनेने मराठी माणसाला न्याय देण्याचे काम केले. बाबरी मशीदीचा ढाचा पाडला. तेव्हा भाजपने अंग झटकले होते. त्यानंतर त्याची जबाबदारी बाळासाहेबांनी घेतली. त्यांनी आम्हाला हिंदुत्व शिकवू नये. भाजपचे हिंदुत्व बेगडी आहे.

फडणवीसांनी शिवसेना फोडली

चंद्रकांत खैरे म्हणाले, अडीच वर्षे उद्धव ठाकरे यांच्या नेतृत्वात अप्रतिम काम झाले. मात्र त्यांच्या सहकार्‍यांनी धोका दिला. प्रचंड खोक्यांचा वापर पक्ष फोडण्यासाठी झाला आहे. लोकांच्या मूलभूत प्रश्नांकडे लक्ष जाऊ नये, यासाठी जाणीवपूर्वक वाद निर्माण केले जातात. हा सगळा प्रकार राज्य शासन पुरस्कृत आहे. यामागे उपमुख्यमंत्री देवेंद्र फडणवीस यांचा हात आहे. एखाद्या पक्ष फोडण्याचे नीच काम फडणवीस यांनी केले आहे.

शिवगर्जना यात्रेला उत्तम प्रतिसाद

मिंधे सरकाराचा लेखाजोखा जनतेसमोर मांडण्यासाठी ही शिवगर्जना यात्रा आहे. याला लोकांचा आणि शिवसैनिकांचा उत्तम प्रतिसाद मिळत आहे, असा दावा खैरे यांनी केला. यावेळी शिवसेनेचे जिल्हाप्रमुख संदीप गिर्‍हे, संपर्कप्रमुख प्रशांत कदम, युवासेनेचे शरद कोळी, शिल्पा बोडखे, हर्षल काकडे, प्रवक्त्या शिल्पा बोडखे, डॉ. गोपाळसिंह बछिरे, माजी नगरसेवक वीरभद्र गादगे, विभागप्रमुख सोपान बांगर, प्रशांत डिघुळे, विलास शिंदे आदींसह स्थानिक पदाधिकारी उपस्थित होते.