लवकरच काम सुरू:सास्तूरजवळ नवीन पुलामुळे वाहतूक‎ सुरळीत, चालकांची अडचण होणार दूर‎

तालुक्यातील सास्तूर चौरस्ता ते सास्तूर‎ रोडवर असणाऱ्या अरुंद व धोकादायक‎ पुलामुळे आत्तापर्यंत वाहनांचे अनेक‎ अपघात झाले आहेत. त्यामुळे या‎ पुलाच्या ठिकाणी नवीन मोठा पूल‎ उभारणीचे काम लवकरात लवकर सुरू‎ करावे, अशी मागणी नागरिकांतून केली‎ जात आहे. याबाबत सार्वजनिक‎ बांधकाम विभागाशी संपर्क साधून‎ विचारणा केली असता पुढील दहा ते‎ पंधरा दिवसांत या नवीन पुलाचे काम‎ सुरू होणार असल्याचे सांगण्यात आले‎ आहे.‎ तालुक्यातील सास्तूर चौरस्ता ते‎ सास्तूर गावाकडे जाणाऱ्या रस्त्यावर‎ निम्न तेरणा प्रकल्पाच्या उजव्या‎ कालव्यावर एक अरुंद पूल उभारण्यात‎ आला आहे. हा पूल उभारून जवळपास‎ ३० वर्ष झाल्याचे नागरिक सांगतात. या‎ रस्त्यावर मोठ्या प्रमाणात वाहनांची‎ वर्दळ असते.

त्यामुळे दुचाकी,‎चारचाकी वाहनांची नेहमी ये-जा होताना‎ दिसून येते. लोहारा तालुक्यातील‎ उमरग्याला जाणारी बहुतांश वाहने याच‎ रस्त्यावरून ये-जा करत असतात. परंतु‎ या पुलाची सध्या मोठ्या प्रमाणात‎ दुरावस्था झाल्याचे दिसून येत आहे. या‎ पुलाचे एका बाजूचे संरक्षक कठडेही‎ तुटले आहेत. तसेच या पुलावरून एखादे‎ चारचाकी वाहन जायचे असेल तर‎ समोरून येणाऱ्या दुचाकी किंवा‎ चारचाकी वाहनाला थांबावे लागते. ते‎ वाहन गेलं की मग वाहनाला यायला‎ संधी मिळते. या प्रकारामुळे‎ वाहनचालकांची मोठी अडचण झाली‎ होती. त्यामुळे या ठिकाणी लवकरात‎ लवकर नवीन मोठा पूल उभारण्यात‎ यावा, अशी मागणी वाहनचालक व‎ नागरिकांतून केली जात आहे. बांधकाम‎ विभागाने लवकरच कामास सुरूवात‎ होणार असल्याचे सांगितल्याने आशा‎ निर्माण झाली आहे.‎

नवीन पूल १२ मीटर रुंदीचा‎
सार्वजनिक बांधकाम विभाग लोहाराचे‎ उपअभियंता एस. एस. घोडके यांनी सांगितले‎ की, नवीन होणारा पूल १२ मीटर रुंदीचा असून‎ पूल पूर्ण झाल्यावर भविष्यात वाहतुकीस‎ कसलाही अडथळा निर्माण होणार नाही. या‎ नवीन पुलाचे काम यापूर्वीच सुरू होणार होते.‎ परंतु निम्न तेरणा प्रकल्पातून कालव्याद्वारे‎ शेतीसाठी पाणी सोडण्यात येते. या पुलाचे काम‎ सुरू केले असते तर ऐन उन्हाळ्यात शेतीसाठी‎ सोडण्यात येणारा पाणीपुरवठा करण्यासाठी‎ अडचण निर्माण झाली असती.‎