गुन्हा दाखल‎:अखेर शासकीय अभियोक्ता जाधवर‎ यांच्यावर ॲट्रॉसिटीचा गुन्हा दाखल‎

विशेष अनुसूचित जाती व जमाती अत्याचार‎ प्रतिबंध कायद्यांतर्गत (ॲट्रॉसिटी) दाखल‎ केलेल्या खटल्याच्या एकाही सुनावणीसाठी‎ शासकीय अभियोक्ता शरद जाधवर हजर‎ राहिले नाहीत. त्यामुळे त्यांच्यावर कर्तव्यात‎ कसूर केल्याबाबत तातडीने कारवाईचे आदेश‎ विधी व न्याय विभागाने दिले होते. त्यानुसार‎ शुक्रवारी आनंदनगर पोलिस ठाण्यात‎ अॅट्रॉसिटीतंर्गत गुन्हा दाखल झाला.‎ धाराशिव तालुक्यातील केशेगाव येथील‎ लहू रामा खंडागळे यांचा मुलगा विकास‎ खंडागळे यास दि.५ मे २०१५ रोजी गावातील ९‎ जणांनी जातीवाचक शिवीगाळ करत‎ दिवसात ३ वेळा मारहाण केली. भांडण‎ सोडवण्यासाठी गेलेल्या त्याच्या आई-वडील,‎ आजी-आजोबा व नातेवाइकांना जातीवाचक‎ शिवीगाळ करून त्यांनाही मारहाण केली.‎

तसेच त्याचे आजोबा रामा खंडागळे यांच्या‎ घरात विकास यास लपवून ठेवले असता‎ आरोपींनी ते घर पेटवून दिले. याप्रकरणी‎ बेंबळी पोलिस ठाण्यात ॲट्रॉसिटी‎ कायद्यानुसार गुन्हा दाखल करण्यात आला‎ होता. तसेच न्यायालयात त्यावर सुनावणी‎ सुरू होती. मात्र, त्या सुनावणीस जाधवर हे‎ आरोपींसह संगनमत करून गैरहजर रहात‎ होते. न्यायालयाने यावर ताशेरे ओढत जाधवर‎ यांच्यावर कारवाईचे आदेश दिले होते. मात्र,‎ त्यांच्यावर कारवाई होत नव्हती. पीडित‎ व्यक्तीच्या सततच्या पाठपुराव्यामुळे अखेर‎ शरद जाधवर यांच्यावर ॲट्रॉसिटी अंतर्गत‎ गुन्हा दाखल झाला आहे. दरम्यान, जाधवर‎ यांना अटक करण्यात येणार की अटकेची‎ कारवाई करण्यास टाळाटाळ करून त्यांना‎ जामीन मिळण्यासाठी मदत केली जाणार, की‎ अटकपूर्व जामीन मिळेपर्यंत वाट बघणार,‎ याकडे लक्ष लागले आहे.‎