संदेश:लोहारा शहरात हरी‎ नामाच्या गजरात ग्रंथदिंडी‎

मराठवाडा शिक्षण प्रसारक मंडळ‎ औरंगाबाद संचालित लोहारा‎ शहरातील भानुदासराव चव्हाण‎ महाविद्यालयाने मराठी राजभाषा‎ दिनाचे औचित्य साधून मंगळवारी‎ ग्रंथ दिंडीचे आयोजन केले होते.‎ दिंडीतून मराठी भाषेचे संवर्धन‎ आणि जतन करून शांततेचा आणि‎ समतेचा संदेश देण्याचा प्रयत्न‎ करण्यात आला.‎

या ग्रंथदिंडीमध्ये तुकोबांची गाथा,‎ महात्मा फुले समग्र वांगमय,‎ भारताचे संविधान, भगवतगीता,‎ ज्ञानेश्वरी, रामायण, कुराण इत्यादी‎ पवित्र ग्रंथाची दिंडी हरी नामाच्या‎ गजरात काढण्यात आली.‎ महाविद्यालय विकास समितीचे‎ सदस्य आयुब शेख, माजी‎ नगरसेवक श्रीनिवास माळी,‎ कमलाकर शिरसाट, सय्यद पाशा‎ पटवारी, शरीफ हेड्डे यांच्या हस्ते‎ पूजन करून उद्घाटन करून‎ दिंडीला सुरुवात करण्यात आली.‎

यावेळी महाविद्यालयातील‎‎‎‎‎‎‎‎‎‎‎‎ विद्यार्थ्यांनी पारंपरिक वेषभूषा धारण‎ केली होती. मुलींनी क्रांती ज्योती‎ सावित्रीबाई फुले, राजमाता जिजाऊ‎ वेशभूषेतून साकारल्या तर‎ विद्यार्थ्यांनी वारकरी संप्रदायाचा‎ पेहराव परिधान केला होता. या ग्रंथ‎ दिंडीला शहरातील डॉ. बाबासाहेब‎ आंबेडकर चौकातून सुरुवात करून‎ छत्रपती शिवाजी महाराज चौक मार्गे‎ बसस्थानक व परत त्याच मार्गे येऊन‎ महाविद्यालयामध्ये सांगता करण्यात‎ आली. या प्रसंगी शहरातील विविध‎ मान्यवर तसेच नागरिक मोठ्या‎ संख्येने उपस्थित होते.

प्राध्यापकांची फुगडी
‎छत्रपती शिवाजी महाराज‎ चौकामध्ये ग्रंथ दिंडीचे आगमन‎ झाल्यानंतर विद्यार्थी आणि‎ प्राध्यापकांनी विविध अभंग,‎ गवळणी म्हणत आणि वारकरी‎ संप्रदायातील फुगडी हा कलाप्रकार‎ सादर केला. या फुगडीने सर्वांचेच‎ लक्ष वेधले होते.‎