लूट:घरपोच सिलिंडरसाठी अधिकचे‎ पैसे, ‘हेल्पलाइन''वर तक्रार करा‎

‎घरपोच गॅस सिलिंडरसाठी जास्तीचे पैसे ‎मागितले जात असल्याची ओरड भूम ‎शहरातील नागरिकांमधून होत आहे.‎ मात्र, प्रत्यक्षात तक्रारी होत नसल्याचे‎ दिसून येत आहे. नागरिकांनी जागरूक‎ राहून संबंधीत गॅस कंपनीच्या‎ हेल्पलाइनवर तक्रार नोंदवण्याचे‎ आवाहन प्रशासनाकडून करण्यात आले ‎ ‎ आहे.‎ भूम तालुक्यात कुऱ्हाडबंदी झाल्याने‎ गॅस वापरणाऱ्या कुटुंबांच्या संख्येत वाढ ‎झाली आहे. शिवाय शासनाकडूनही‎ विविध योजनांच्या माध्यमातून घरोघरी‎ गॅस जोडण्या देण्यात आल्या आहेत.‎ परंतु काही वर्षापूर्वी स्वस्त असलेले‎ सिलिंडर एक हजार रुपयांच्या पुढे गेले‎ आहे.

येथील रत्नमाला इंडेन गॅस‎ एजन्सीला १५ किलोमीटरपर्यंत घरपोच‎ सिलिंडर टाकी १०७७ रुपयांना देणे‎ बंधनकारक आहे. परंतु एजन्सीकडून‎ घरपोच गॅस सिलिंडरसाठी २० रुपये‎ अधिक तर ग्रामीण भागात ५० रुपये‎ अधिक घेतले जात असल्याची ओरड‎ आहे. गॅस सिलिंडर घरपोच देण्यासाठी‎ वाहतुकदाराला एजन्सीकडून देण्यात‎ येतात.परंतु नागरिकांनी अधिकचे पैसे देऊ‎ नये, तक्रार असल्यास इंडेन गॅस कंपनीच्या‎ हेल्पलाइनवर तक्रार करण्याचे ‌आवाहन‎ प्रशासनाने केले आहे.

तालुक्यात ग्रामीण‎ भागात गॅसचे नियमबाह्य केंद्र सुरू आहेत.‎ या ठिकाणी गॅसचा मोठ्या प्रमाणात साठा‎ केला जात आहे. हे नियमबाह्य गॅस‎ केंद्रचालक अधिकचे पैसे लुटत आहेत.‎ नागरिकांनी याबाबत हेल्पलाइनवर तक्रार‎ दाखल करण्याचे आवाहन प्रशासनाने‎ केले. घरगुती सिलिंडरसाठी १०७७ रुपये‎ मोजावे लागत आहे.

त्यात घरपोचसाठी‎ अधिकचे पैसे ग्राहकांना मोजावे लागत‎ आहे. शहर व ग्रामीण भागात एजन्सी‎ चालकांनी घरपोच सिलिंडरसाठी‎ ग्राहकांकडून अधिक पैसे घेतले जातात,‎ याकडे लक्ष देण्याची मागणी‎ नागरिकांमधून होत आहे. दरम्यान,‎ रत्नमाला इंडेन गॅस एजन्सीला विचारले‎ असता ‘वितरण कर्मचाऱ्यांना अधिकचे‎ पैसे घेऊ नका’, अशा सूचना केल्या‎ असल्याचे सांगण्यात आले. दरम्यान,‎ वितरण कर्मचाऱ्यांना पुरेशा पगार नसून‎ काही कर्मचारी पैसे घेतात, असे एका गॅस‎ वितरण कर्मचाऱ्याने सांगितले.‎

नकार देऊनही पैसे मागतात‎
आम्ही अधिकचे पैसे देण्यास अनेकदा नकार देतो. परंतु काहीजण‎ पैसे मागतात. सिलिंडर आणण्यासाठीही जाता येत नाही. त्यामुळे‎ अधिकचे पैसे दिले जातात. - एस. ए. हुंबे, गृहिणी.‎

दुसरा पर्याय दिसत नाही
‎कामामुळे स्वत सिलिंडर आणणे जमत नाही. घरपोच‎ मागितल्यास ४० रुपये अधिकचे द्यावे लागते. त्याला दुसरा‎ पर्यायही दिसत नाही. - सलिमबी शेख, गृहिणी.‎

या क्रमांकावर नोंदवा
तक्रार‎ भूम तालुक्यात इंडेन गॅसचे ग्राहक अधिक प्रमाणात आहेत. या‎ ग्राहकांना तक्रार नोंदवण्यासाठी कंपनीकडून १८००२३३३५५५ हा‎ क्रमांक देण्यात आला आहे. रत्नमाला इंडेन गॅस एजन्सी -‎ ०२४७८ -२७२७१७ या क्रमांकावर तक्रार नोंदवला येणार आहे.‎