संकटांवर मात:संकटावर मात; कोरोनात रोजगार जाऊनही भाकरीच्या व्यवसायातून उदरनिर्वाह‎

कोरोना काळात पुणे येथील काम सुटले, झाडावर‎ चढून आंबे काढताना पाय मोडला, पुन्हा‎ कामासाठी परतणे शक्य झाले नाही. यामुळे‎ उदनिर्वाहासाठी शेतात वास्तव्य करत कडक‎ भाकरी तयार करण्याचा व्यवसाय सुरू केला.‎ परिसरात भाकरी विकून उदरनिर्वाह सुरू आहे.‎ नातेवाईकांची साथ नसताना स्वत:च्या जिद्दीच्या‎ बळावर उमरगा तालुक्यातील कलदेव निंबाळा‎ येथील युवकाने संकटांवर मात केली आहे.‎ कलदेव निंबाळा येथील कल्याणी शरणाप्पा‎ घोटमाळे (४०) पुणे येथे स्कूलबस चालक‎ म्हणून काम करत होते. मात्र, कोरोनाच्या काळात‎ लॉकडाऊनमुळे नोकरी गेली. त्यांच्या पत्नीलाही‎ कामावरून कमी करण्यात आले. दोघांचाही‎ रोजगार गेल्यामुळे उदरनिर्वाहाची भ्रांत होऊ‎ लागली.

यामुळे आपला एक मुलगा व २ मुलींसह‎ ते गावात येऊन शेतात वास्तव्य करू लागले.‎ गतवर्षी झाडावर आंबे काढण्यासाठी चढताना‎ खाली पडून पाय मोडला. यामुळे पुन्हा त्यांना‎ पुण्याला जाता आले नाही. नंतर पायात रॉड‎ टाकून उपचार करुनही पाय कायमचा जायबंदी‎ झाला. त्यांना वाहन चालवणे अशक्य आहे. मात्र,‎ गावात राहून पोट कसे भरायचे हा प्रश्न होता.

‎परंतु, या संकटावर मात करण्यासाठी घोटमाळे‎ यांनी भाकरी तयार करण्याचा व्यवसाय सुरू‎ केला आहे. कडक बाजरीच्या व ज्वारीच्या‎ साध्या भाकरी ते तयार करत असतात. त्यांच्या‎ पत्नी राजश्री यांनी याची जबाबदारी घेतली असून‎ तयार झालेल्या भाकरी परिसरातील ढाबे व‎ हॉटेलमध्ये विक्री करण्याचे काम घोटमाळे‎ करतात. दोघांच्या परिश्रमाने फायदा होत आहे.‎

कोरोना व स्वत:च्या अपंगत्वावर मात करत‎ घोटमाळे दांपत्य पुन्हा पुनश: हरि ओम म्हणत‎ संसाराला आकार देण्याचा प्रयत्न करत आहेत.‎ सुरुवातीला कमी फायदा : कोरोनाच्या‎ काळात सुरुवातीला यास फार प्रतिसाद मिळाला‎ नाही. अशावेळी तत्कालीन सरपंच सुनिता‎ पावशेरे व देविदास पावशेरे या दांपत्यानी शेतात‎ जावून या घोटमाळे कुटुंबाला भेट देवून प्रोत्साहन‎ दिले. भाकरीच्या व्यवसायाची सोशल‎ मीडियाच्या माध्यमातून व्यापक प्रसिद्धी करून‎ ग्राहक उपलब्ध करून दिल्याने मागणी‎ वाढण्यासाठी मोठी मदत झाली. अनेक व्यापारी‎ घरापर्यंत येवून बाजरी, ज्वारीच्या भाकरी घेवून‎ जावू लागल्याने आर्थिक फायदा होवू लागला.‎

सायकलवरुन व्यवसाय सुरू,‎ महिन्यापूर्वी घेतली दुचाकी‎
कल्याणी यांच्या पायाची जखम‎ कालांतराने बरी झाल्यानंतर सुरुवातीला‎ त्यांनी सायकलवरून भाकरीचा‎ व्यवसाय सुरू केला. महिन्यापूर्वी‎ दुचाकी घेऊन त्यावर भाकरी विक्री सुरू‎ केली. फोन, सोशल मिडीयावर‎ आलेल्या मागणीनंतर चांगल्या प्रतिच्या‎ बाजरी, ज्वारीच्या भाकरी घरपोच करत‎ आहेत. दररोज १५० ते २०० ताज्या तसेच‎ कडक चुलीच्या आरावर भाजलेल्या‎ भाकरीची विक्री व्यवसायातून आर्थिक‎ सुबकता साधली आहे.‎

महिन्याला‎ १० हजार‎
ज्वारी व बाजरीच्या भाकरी विक्रीतून‎ महिन्याला आम्ही किमान १० हजार‎ कमावतो. त्यातून घरखर्च आणि तीन‎ मुलांचे शिक्षण होते. अडचणीच्या काळात‎ सरपंच सुनीता पावशेरे यांनी सहाय्य केले.‎ - राजश्री घोटमाळे.‎

शेतामध्ये राहूनच काम‎
सध्या घरगुती वादामुळे घाेटमाळे आपल्या‎ शेतात वास्तव्यास हआहे. शेतातच लहानशे‎ पत्रा शेडचे घर करुन दोघांनी चुलीवरील कडक‎ भाकरीचा हा व्यवसाय सुरू केला. पायामुळे‎ फिरणे फारच अशक्य व त्रासाचे आहे. तरीही‎ जिद्दीने संकटावर मात करत घोटमाळे कुटुंबीय‎ नेटाने व्यवसाय करत आहेत. रात्री शेतात किर्र‎ अंधार असतो. केवळ दोन चार्जिंगच्या बल्बवर‎ त्यांना रहावे लागत आहे.‎