दिव्य मराठी विशेष:कुस्तीच्या दंगलीने श्री अल्लमप्रभू यात्रेची सांगता ; विविध कार्यक्रमांचे सादरीकरण

शहराचे ग्रामदैवत अल्लमप्रभू यात्रेचा सोमवारी विविध कार्यक्रमांनी समारोप झाला. शनिवार, रविवार व साेमवारी यात्रेमुळे शहरात चैतन्याचे वातावरण होते. हजारो भाविकांची उपस्थिती व कुस्तीच्या दंगलीने यात्रेची सोमवारी सांगता झाली.श्री अल्लमप्रभू ट्रस्टच्या वतीने कीर्तन, लावण्यांसह कुस्तीच्या फडला प्रचंड गर्दी होती. यात्रेत सर्व जातीधर्माचे लोक उत्साहात सहभागी झाले. श्री अल्लमप्रभू मंदिराचा मार्ग व परिसर विविधतेने फुलून गेला हाेता. विविध पाळणे, सर्कस, लहान मुलांचे मनोरंजनाचे उपक्रम यात्रेत दाखल झाले होते. यात्रेत ग्रामीणसह शहरातील माहेरवाशिनी हजेरी लावतात. मुबंई, पुणे, औरंगाबाद इतरत्र बाहेरगावी असलेली नोकरदार मंडळीही यात्रेत येतात. कुस्तीच्या फडावर उस्मानाबाद जिल्ह्यासह कोल्हापूर, सोलापूर, पुणे, नगर, बीड, लातूर जिल्ह्यातील पैलवान सहभागी झाले होते.

यावेळी पाटोदा येथील मल्ल राहूल पवार विरुद्ध भूम येथील अस्लम जमादार या दोन्ही मल्लांची कुस्ती रंगतदार झाली. यामध्ये अस्लम जमादार विजयी झाला. या कुस्तीसाठी माजी नगराध्यक्ष संजय गाढवे यांनी २१ हजाराचे पारितोषिक दिले. पंच म्हणून हुसेन सय्यद यांनी काम पाहिले. शंकर गाढवे, युवा नेते सूरज गाढवे, मामू जमादार, प्रा. अरुण गाढवे, पोलिस उपनिरीक्षक कैलास भारती, काँग्रेस तालुका अध्यक्ष रुपेश शेंडगे, सचिन लोखंडे, राजाभाऊ गवळी, बप्पा गाढवे, भोळे उपस्थित होते. तीन दिवस विविध रंगाच्या विविध आकाराच्या सादरीतून शोभेची दारू उडवण्यात आली. तीन दिवस मनोरंजनात्मक कार्यक्रम घेण्यात आले. कुठलाही अनुचित प्रकार घडला नाही. यात्रेसाठी पोलिस निरीक्षक मंगेश साळवे यांनी माेठ्या प्रमाणात पोलिस दल तैनात ठेवले होते.

अधिक वर्गणीमुळे तिकीट दरात वाढ श्री अल्लमप्रभूंच्या तीन दिवसीय यात्रेत विविध प्रकारचे पाळणे, सर्कस यासह लहान मुलांचे मनोरंजनाचे खेळ दाखल झाले आहेत. या यात्रेत पाळणे, छोट्या दुकाने व्यावसायिकांकडून मोठ्या प्रमाणात वर्गणी घेण्यात आली. त्यामुळे या व्यावसायिकांनी तिकीटाच्या दरात तसेच वस्तूंच्या किंमतीत भरमसाठ वाढ केली. यामुळे यात्रेत येणाऱ्या भाविक-भक्तांच्या खिशाला चांगलीच झळ बसली असून संताप व्यक्त करण्यात येत आहे.