कर वसूल:उमरगा पालिकेची सर्वाधिक 99 % करवसुली , कळंब 54 टक्क्यांवरच‎

कर वसुलीसाठी नगरपालिकांकडे अवघे १७‎ दिवस शिल्लक राहिले आहेत. जिल्ह्यातील दहा‎ नगरपालिकांपैकी सर्वाधिक ९८.९८ टक्के कर‎ वसुली उमरगा नगर पालिकेची आहे. सर्वात‎ कमी ५३.९१ टक्के वसुली कळंब पालिकेची‎ आहे. कमी वसुली असणाऱ्या पालिकांना युद्ध‎ पातळीवर काम करावे लागणार आहे.‎ नगरपालिकांचा निम्मा कारभार हा उत्पन्नाचे‎ मोठे साधन असलेल्या कर वसुलीवर असतो.‎ मात्र, ११ महिन्यानंतरही जिल्ह्यातील‎ नगरपालिकांची वसुली जेमतेमच आहे. विशेष‎ म्हणजे आतापर्यंत पालिकांना १५ व्या वित्त‎ आयोगाचा निधी मिळत असल्याने त्यातून‎ खर्चाचे प्रयोजन व्हायचे. मागील ११‎ महिन्यांपासून हा निधीच शासनाकडून वितरीत‎ झालेला नाही. त्यामुळे अनेक पालिका‎ अडचणीत आल्या. त्याचा सर्वाधिक फटका‎ धाराशिव पालिकेला बसत आहेत. धाराशिव‎ पालिकेची वसुली ८० टक्क्यांपुढे पुढे गेली नाही.‎ दुसरीकडे तीन नगरपालिकांनी कर वसुली ६०‎ टक्क्यांच्या आतच असल्याचे नगरपालिका‎ प्रशासनाच्या १० मार्च रोजीच्या अहवालातून‎ दिसून येते.‎

पाणीपट्टी वसुलीत धाराशिव अग्रेसर‎
पाणीपट्टी वसुलीत धाराशिव पालिका प्रथम असून ९०.३० टक्के‎ वसुली झाली आहे. यात उमरगा पालिकेची ८५.२५ टक्के‎ वसुली आहे. यातही कळंब पालिका तळाला असून त्यांची‎ वसुली केवळ ३६.६२ टक्के आहे. परंडा पालिकेने ४० टक्के‎ पाणीपट्टी वसूल केली.‎

शिक्षण करातही उमरगा पालिकाच पुढे‎
शिक्षण कर वसुलीतही उमरगा पालिका पुढे असून शंभर टक्के‎ वसुली यांनी केली आहे. नळदुर्ग ९६ टक्के वसुली आहे. येथेही‎ कळंब पालिका मागेच आहे. रोहयो करात नळदुर्ग पालिकेने‎ सर्वाधिक ९९.७६ टक्के वसुली केली. यातही कळंब पालिका‎ पिछाडीवर आहे.‎

सुविधा दिल्याने वसुली‎
नागरिकांना चांगल्या सुविधा‎ दिल्या आहेत. भोंगा लावून कर‎ भरण्याचे आवाहन केले. वेळेवर‎ मागणी पत्र उपलब्ध केले.‎ डिसेंबरनंतर सर्वांना कर लागणार‎ असल्याचेही समजून सांगितले.‎ त्यामुळे नागरिकांचा कर भरण्याकडे‎ कल वाढला. अद्यापही पूर्ण शंभर‎ टक्के वसुलीसाठी आमचे प्रयत्न‎ सुरु आहेत.‎ -रामकृष्ण जाधवर,‎ मुख्याधिकारी, नगर परिषद, उमरगा.‎